تبلیغات اینترنتیclose
سید ابوالقاسم نباتی نی ياشاييشي و دوشونجه‌لري - 1 (دکتر حسین محمدزاده صدیق)
سید ابو القاسم نباتی در پژوهشهای دکترحسین محمدزاده صدیق
شرح احوال، افکار و آثار سید ابو القاسم نباتی بر اساس تحقیقات استاد دکتر حسین محمدزاده صدیق
موضوع : ياشاييشي و دوشونجه‌لري, | بازدید : 587

     1- 3. نباتي‌نين دوغوم و اؤلومو

     سيد ابوالقاسم نباتي، خان چوبان و مجنونشاه لقبي ايله مشهور اولان، 1215 هـ . (1179 ش./ 1800 م. ) تاريخينده كليبرين اوشتوبون كندينده آنادان اولان و 1262 هـ . (1230 ش./ 1852 م. ) تاريخينده وفات ائدن اولو عارف شاعيريميزدير.

     اونون آدي ادبيات تاريخيميزده «فضولي» ايله يان- يانا چكيلير، رسمي كلاسيك ادبياتيميزدا اونون كيمي أوركلره نفوذ ائدن و شعرلري خلق ديلي‌نين ازبري اولان شاعير آز تاپماق اولار. نباتي اؤز ياشاديغي ايللرده، ايران- روس قانلي ساواشلارين دا گؤرموشدو. شعرلرينده ايسه آذربايجاندا أوز وئرن ساواش فاجيعه‌سيندن آجي تأثيرلر آلميشدير:

     سنه درد هيجري يكسر ائدرم حكايت، آمما،/ قلم الده ‌سيز سيزيلدار كي بو سؤز بيانا گلمز!

     باسارايت‌هايانه گئتدي، هاني قيشقيريق صداسي،/ نه گليب او خان چوبانـا كي بوقيش موغانا گلمز؟

* * *

     بو چؤل اولموشدا منيم باشيما چوخ ايش گلدي،/ چاتماميش يايا خبر گتديله كيم قيش گلدي.

 

     اونون دوغولدوغو يئر، قاراداغدا يئرلشن اوشتوبون كندي اولموشدور. نباتي دفعه‌لر قاراداغ ولايتي حاققيندا دانيشير و چوخ گومان كي اونو اوتايدا غريب قالان قاراباغ ايله مقايسه ائتمك نيّتي‌ده وار ايميش:

     بو ملكِ قاراداغدا بي‌مونس و غمخوار،/ فرياديما يئت قويما مني ننگلر ايچره.

     ائديب مولكِ قاراداغي منيم بو طبع موزونوم،/ قاراداغ اهلينه بير باغري داغلي لاله‌ي حمرا.

 

     نباتي‌نين اؤزونون ده قئيد ائتديگي كيمي آتاسي‌نين آدي «سيد محترم» اولموشدور:

     محترم اوغلو دئيرلرمنه، آديم مجنون،/ بير آديم خان چوباني، بير بوغوبورما، بورما.

 

     فخر ائتديگي ايسه سيد المرسلين و خاتم النّبيّين «حضرت محمد»r نسلي دير:

     ذاتيميز هاشيمي، نسليميز عرب!

     * * *

     هاشميم، وارث فخر الكلام،/ بيزلره بو شيوه‌ي آبا ايميش!

 

2- 3 نباتي‌نين پئشه‌سي

     نباتي حاققيندا يازي يازانلارين بير چوخو دئييرلر كي نباتي مالدارليق ايشيله مشغول اولارميش. اونون خان چوبان تخلص سئچمگيني‌ده، پئشه‌سي ايله باغلي بيليرلر. «ابوالفضل حسيني» آشاغيداكي شعره استناد ائدرك، اونون، مطلق چوبان اولدوغونو اؤنه سورور:

 

     قويونو يوز ائيله‌ديم بو چؤلده قيشلاق ائتمنم،/ زينت ملكِ موغان، اولتاني گؤزلر گؤزلريم.

 

3- 3. نباتي تخلّصو

     «نبات» سؤزو، مختليف معنالاريندان علاوه، صوفيانه اصطلاحلار آراسيندا ورد و ذكر معنالارينادا گلميشدير. بعضي تدقيقاتچيلارين نظرينجه، نباتي تخلّصونو، «صدر الممالك اردبيلي» اونا وئرميشدير.[1]

     «فيض الله قاسيم زاده» نباتي‌نين آشاغيداكي بئيتينه:

 

     مجنون دئييرلر آديما، آمما نباتي‌يام،/ دائيم ايشيمدي كام آليرام من نباتدان.

 

     استناد ائدرك دئيير:«شاعير اؤزكاميني شيريندن و يا بيتگيدن دگيل، يالنيز سئوگيليسيندن آلان بير گؤزله وورولدوغونو بيلديرير.»[2]

     منجه، نباتي سؤزوده، «گزگز» سؤزو كيمي، اونون ديلينده، عرفان مقاماتينا اشاره ائتمك ايچون سئچيلميشدير.

     سيد ابوالقاسم نباتي‌دن قاباق بو تخلّصو سئچن باشقا شاعيرلرده وارديرلار. او جمله‌دن هيجري اونونجو عصرده ياشايان «نباتي تبريزي» آدلي شاعيريميزين آدي، تحفه‌ي سامي تذكره‌سينده گئدير. «سام ميرزا»، اوندان بو بئيتي‌ده نقل ائدير:

 

     از هواي آن لب شيرين، نباتي روز و شب،/ چون مگس خود را درون شهد ناب انداخته.[3]



39- احد زماني. روزنامه مهد آزادي، 13/ 6/ 82 .

40- ف. قاسيم زاده، س. ا. نباتي سئچيلميش اثرلري، باكي، 1958، مقدمه.

41- سام ميرزا صفوي، تحفه‌ي سامي، چاپ تهران، ص 145 .

صفحه قبل صفحه بعد
نظر شما
نام : *
پست الکترونیک :
وب سایت/بلاگ :
*
:) :( ;) :D
;)) :X :? :P
:* =(( :O @};-
:B /:) =D> :S
کد امنیتی : *

برچسب ها : سید ابو القاسم نباتی از دیدگاه دکتر حسین محمدزاده صدیق, شناختنامه سید ابوالقاسم نباتی بر اساس پژوهشهای دکتر حسین محمدزاده صدیق,سید ابوالقاسم نباتی به روایت دکتر محمدزاده صدیق, پژوهشهای دکتر حسین محمدزاده صدیق پیرامون سید ابوالقاسم نباتی,تحقیقات دکتر حسین محمدزاده صدیق درباره ابو القاسم نباتی, سید ابوالقاسم نباتی به روایت دکتر حسین محمدزاده صدیق, پژوهشهای دکتر حسین محمدزاده صدیق درباره ابوالقاسم نباتی,
ارسال در تاريخ پنجشنبه 6 مهر 1391 توسط دکتر صدیق. ارسال: سید احسان شکرخدایی