تبلیغات اینترنتیclose
سید ابوالقاسم نباتی نی ياشاييشي و دوشونجه‌لري - 2 (دکتر حسین محمدزاده صدیق)
سید ابو القاسم نباتی در پژوهشهای دکترحسین محمدزاده صدیق
شرح احوال، افکار و آثار سید ابو القاسم نباتی بر اساس تحقیقات استاد دکتر حسین محمدزاده صدیق
موضوع : ياشاييشي و دوشونجه‌لري, | بازدید : 656

 4- 3. خان چوبان و مجنون

     البته سؤز يوخ كي نباتي‌نين‌ده بوتون موغاندا ياشايانلار كيمي كؤچري و عشايري حياتي اولموشدور، لاكين خان چوبان تخلّصونده بؤيوك بير معنا واردير. او بو تخلّص واسيطه‌سيله اؤزونو «حضرت موسي» (ع) و اسلامي ادبياتين مشهور تغزّل قهرمانلاريندان اولان مجنون ايله مقايسه ائدير.

     اؤزون «موسي» كيمي كليم الله سايير و باطيني بير عقيده‌يه اساسلاناراق اؤزونده «موسي» روحونون تجسّد تاپماسينا اينانير.

     آذربايجاندا ياشايان اهل حقطايفالاري‌‌نين اعتقادينا گؤره، كائناتدا روح ابديدير و دونيا أوزره مين بير دفعه رجعت ائدر. انسان، حياتيندا ياخشي‌ايش گؤرسه و فيض مبدأيندن ايسته‌سه، روحو داها كاميل شكيلده دونيايا قاييدار.[1] ائله بو اعتقادا اساسلاناراق، نباتي اؤزونده هم «حضرت موسي» و هم مجنونون روحونون تجلي ائتمه‌سينه اينانير:

     رود نيله نئجه غرق ائيلمرم فرعونو،/ كي گليب معجزه‌ي موسيِ عمران أليمه.[2]

     * * *

     رَبِّ اَرني ديلي‌نين ذكري، دؤنوب موسايا،/ دشتِ ايمنده اولوب نورِ تجلّي دليسي![3]

     * * *          

     قورخما دگيل اژدها، بالله عصادير، عصا،/ موسي عمران كيمي، سن يد بيضايا باخ.[4]

     * * *

     گئتديم بيابان گشتينه، ووردوم تجلي دشتينه،/ ائتديم تماشا طورده، موسايا من، موسايا من.[5]

     * * *

     موسي كيم ايدي گؤستره خلقه يد بيضا؟[6]

     * * *

     اولوب‌مجنون‌كيمي سرمست جام باده‌ي وحدت،/ دوشوب صحرالارا وحشيلر ايله هم‌قاطار اولموش![7]

     * * *

     محترم اوغلو دئيرلر منه، آديم مجنون.[8]

     مني عالملره فاش ائيله‌دي اول ثاني ليلا،/ مني اول دلبر شيرين سخن، مجنون يار ائتميش.[9]

     * * *

     جانه اود ووردوم اؤزوم پروانه‌لردن كوسموشم،/ تا كي مجنون اولموشام، ديوانه‌لردن كوسموشم.[10]

     * * *

     مجنون دئيرلر آديما آمما نباتيام،/ دائيم ايشيمدي كام آليرام من نباتدان.[11]     

     * * *

     ليلي‌دئييب، چكديم‌آمان، قانياش‌تؤكوب‌ائتديم‌فغان،/ دوشدوم‌يئنه‌مجنون كيمي‌صحرايا‌من، صحرايا‌من.[12]

     * * *

     مجنون كيمي عوريان و دل آزرده و مجنون،/ داغدان داغا گزگز گزيرم سنگلر ايچره![13]

     * * *

     مني مجنون ائدن يارِ پريوش،/ طاقتيم كسيلدي، يئتيشديم جانه![14]

     * * *

     نباتي مجنون تك گاهي آغلادين.[15]

     * * *

     مجنون تك سئير ائتديم نئچه داغلاري.[16]

 

     باشقا طرفدن قاراداغدا ياشايان خان چوبان طايفاسي واردير. «سيد عظيم» بيريئرده دئيير:      

     ائتدي عبدالعلي بيك خاطيريني خوش- خرام،/ خاصه كيم خان چوباني طايفه‌سي، جمله عوام.

 

     بئله‌ليكله بيز نباتي‌نين مالدارليق پئشه‌سي اولدوغونو و ايلين قيش فصليني موغان چؤللرينده و يايي ايسه آرازين اطرافينداكي زنگين، ياشيل و اوتلاق يئرلرده كئچيرمگيني و كؤچري حيات ياشاديغيني هئچ انكار ائتميريك، و اونون خان چوبان تخلّصونون، بو پئشه‌سي ايله و يا خان چوبان طايفاسيله علاقه‌دار اولدوغونون دوغرو اولوب اولماماديغينا توخونماياراق، بو معنانين بؤيوك بير معنوي دگر داشيديغينا اينانيريق. فارسجا ديواني‌‌نين بير يئرينده دئيير:

     از خامه‌ي خان چوباني من،/ عاجز شده كلكِ ماني من.

     خواهي كه شوي تو نيز موسي،/ يك چند بكن شُباني من.

 

5- 3. سفرلري

     نباتي‌نين شعرلريندن، اونون سفر اهلي اولدوغو آيدينلاشير. قاراداغ و آذربايجانين بير چوخ كندلري و شهرلريني گزميشدير. اوشتوبون اطرافي و ديزمار ماحاليندان علاوه، آغدام، لنكران، ساليان و سائره يئرلره گئتميشدير. خوراسان و تبريزده هابئله اردبيل‌ده‌ده اولموشدور. ولاكين تبريز و يا اردبيلده هانسي زامان و نئچه ايل دايانديغيندان هله‌ليك خبريميز يوخدور.

 

6- 3. گزگز

     ايضاحات بؤلومونده (7/ 1- 1 )ده گتيرديگيم كيمي، بعضي تدقيقاتچيلار «گزگز» سؤزونون، نباتي‌نين سئوگيليسي‌نين آدي اولدوغونا اينانيرلار. اونون هم «گزگز» رديفلي غزلي و همده بير چوخ يئرده بو آدا اشاره‌لري واردير:

     نيسبتي يوخ پري‌يه گزگزين، الله بيلير،/ ملگين حدّي نه‌دير، حوري‌دير، حورا، حورا!

     بيري صهبادان اولوب مست، بيري مينادان،/ مني ديوانه قيليب بو گؤزو شهلا، شهلا!

 

     منجه بو آدين‌دا، «نباتي» سؤزو كيمي عارفانه معناسي اولماليدير. شاعير بو كلمه ايله سرگشته‌ليك و حيرت مقامينا اشاره ائدير.

 

7- 3. اوشتوبون

     اوشتوبون كندي آراز چايي ياخينليغيندا، قولان و هئراز كندلري يانيندا ايكي داغ آراسيندا و بير بؤيوك قايا أوزه‌رينده تيكيلميشدير. كند اهلي اسكي زامانلاردان باغدارليق و مالدارليق پئشه‌لري ايله مشغول اولموشلار. حال حاضيردا هئراز كندي داغيلميشدير و يئرلرينه أوشتوبون اهاليسي صاحيب چيخميشلار.

     اوشتوبون كندي مزارليغيندا، مرمردن يونولموش باش داشلاري واردير. اونلارين ايچيندن «خواجه ملك» مزاري باش داشي أوزه‌رينه 843 هـ . و «خواجه احمد» باش داشي أوزه‌رينه 976 هـ . تاريخلري اوخونماقدادير.

 

 



42 ← متون نظم تركي ايران، ص 337 .

43 ← 16/ 20- 1

44 ← 4/ 49- 2

45 ← 14/ 3- 1

46 ← 34/ 2- 1

47 ← 6/ 2- 7

48 ← 2/ 9- 1

49 ← 14/ 1- 1

50 ← 3/ 14- 2

51 ← 1/ 28- 2

52 ← 9/ 32- 2

53 ← 10/ 34- 2

54←7/ 40- 2

55← 1/ 13- 3

56 ← 5/ 16- 3

 57 ← 3/ 5- 6

صفحه قبل صفحه بعد
نظر شما
نام : *
پست الکترونیک :
وب سایت/بلاگ :
*
:) :( ;) :D
;)) :X :? :P
:* =(( :O @};-
:B /:) =D> :S
کد امنیتی : *

برچسب ها : سید ابو القاسم نباتی از دیدگاه دکتر حسین محمدزاده صدیق, شناختنامه سید ابوالقاسم نباتی بر اساس پژوهشهای دکتر حسین محمدزاده صدیق,سید ابوالقاسم نباتی به روایت دکتر محمدزاده صدیق, پژوهشهای دکتر حسین محمدزاده صدیق پیرامون سید ابوالقاسم نباتی,تحقیقات دکتر حسین محمدزاده صدیق درباره ابو القاسم نباتی, سید ابوالقاسم نباتی به روایت دکتر حسین محمدزاده صدیق, پژوهشهای دکتر حسین محمدزاده صدیق درباره ابوالقاسم نباتی,
ارسال در تاريخ پنجشنبه 6 مهر 1391 توسط دکتر صدیق. ارسال: سید احسان شکرخدایی