تبلیغات اینترنتیclose
سید ابو القاسم نباتی نین اينانجي و عقيده‌سي - 1 (دکتر حسین محمدزاده صدیق)
سید ابو القاسم نباتی در پژوهشهای دکترحسین محمدزاده صدیق
شرح احوال، افکار و آثار سید ابو القاسم نباتی بر اساس تحقیقات استاد دکتر حسین محمدزاده صدیق
موضوع : اينانجي و عقيده‌سي, | بازدید : 651

 1- 4. نباتي و حضرت علي (ع)

     نباتي «حضرت علي بن ابيطالب» - عليه السّلام- ـي سئوير. بو سئوگي ايسه ان اوجا ذيروه‌لره قالخميش بير درجه‌ده، اونو دلي- ديوانه ائدير، بلكه سبب اولوركي بير چوخ يئرده اؤزوندن چيخير، اختيارين الدن وئرير و حدّيندن آشير، شطحه گئدير، اؤزون بيلمير، كئفلنير، مست اولور، سرخوشجاسينا بوتون وجودو علي (ع) عشقي ايله دولور.

     گاهدان اوخوجويا بئله گليركي اونون چاغيرديغي تغزّل قهرماني يالنير «حضرت علي» (ع) دير. اونون سسله‌ديگي مولا، شاه لافتي، شاه نجف، شاه لوكشف، يار، دلدار، اله، پري، صنم و سائره عنوانلار اونا وئريلميشدير و بوتون خلاقيّتي اونون خاطيرينه و اونا خيطابدير:

     مني بو اسم اعظم ائتدي، ناطيق،/ منيم مجموع ديوانيم علي دير.

     مخدوم جهان، مطاعِ كلِّ عالم،/ سرخيل جميع انبيادير حيدر!

 

     باشقا ممدوح يوخدور:

     سانما نباتي هركسه أوز توتوب التجا ائدر،/ تانري بيليركي گؤزلري بيرجه اونون گؤزونده وار.[1]

 

     «او» كيمدير؟ او گوهرِ تاجِ اِنَّما و سرو رياض هَل اَتي دير. او، نباتي‌نين مولك و مالي و تخت و تاجيدير:

     منيم مولكوم، منيم مال و مناليم،/ منيم هم حؤكم و فرمانيم علي دير.[2]

  نباتي‌نين «حضرت علي» (ع) حاققيندا قوشدوغو شورانگيز قصيده‌لري تورك شاعيرلريندن باشقا، فارسجا يازان صوفي مسلك شاعيرلر ايچون‌ده ايلهام قايناغي و تقليد منبعي اولموشدور. «جلال الدين همايي» (1288 – 1359 ش. ) اوندان تقليد ائدرك معروف يائيه قصيده‌سي يازميشدير. بو قصيده بئله باشلايير:

     تا به كي افسانه از دارا و اسكندر كني؟/ قصه بايد از اميرالمؤمنين حيدر كني.

     گر حديث راست مي‌خواهي و گفتار درست،/ مدح بايد از شه دين، حيدر صفدر كني.

     تا به دست و خامه‌ات يارايي مدح علي است،/ حيف باشد حرف ديگر، ثبت در دفتر كني.[3]

    

     چاغداش فارس شعري‌نين معروف عارف شاعيري الهي قمشه‌اي (اؤلوم 1352 ش.) ايسه، دئيير:

     شاهد كل الجمالِ ايزد يكتا، علي است،/ پرتو اشراق آن پيداي ناپيدا علي است.

     معني فرقان، فروغ ملك جان، فخر جهان،/ شاهد ايمان، شه ايمن، مه بطحي علي است.

     سرّ مطلق، والي حق، پيشواي ما خَلَق،/ كاشف اسرار قرآن، راز ما اَوْحي علي است.[4]

 

     ها بئله «مولانا بهار شيرواني»نين بير پارا فارسجا شعرلريني اؤز آدينا معروف ائدن[5] و «ملك الشّعرا» لقبيني اؤز آتاسيندان ارث آپاردن «محمد تقي بهار»، نباتي‌نين فارسجا يازديغي:

     آنكه صد مرتبه از روي تو تصوير كشيد،/ عاقبت گشت خجل، دست ز تحرير كشيد.[6]

    

     مطلعلي قصيده‌‌سي‌نين مضمونلاريني اؤزونون آشاغيداكي قصيده‌سينده ايشلتميشدير:

     دل من خواهي اي ترك و نداني كه خطاست،/ از چو من عاشق دلباخته، دل بايد خواست.

     آهوي چشمت اي شوخ! دل من بفريفت،/ مگر اين دل نه دل مدحگر شير خداست؟

     بوالحسن آن كه بدو فضل به انجام رسيد،/ وانكه بنهفت توان، فضل وي امروز كجاست.

     آنكه بر جاي نبي بيشتر آفت بگزيد،/ لاجرم بعد نبي صدر خلافت اوراست.[7]

    

2- 4. نباتي‌ده مجازي و حقيقي عشق

     نباتي‌ده مجازي عشق، حقيقي عشق ايچون بير باشلانغيج اولموشدور. ظنّ ائديليركي او گنجليگينده گزگز آدلي بير تات قيزينا وورولور. ولاكين چوخ تئزليكله بو عشق، عارفانه بير وورغونلوغا چئوريلير. البته او، هر بير عارف كيمي مخلوق و ياراديلانا عاشيق اولماني ردّ ائتمير، «عين القضّات همداني» دئميشكن:

     «دريغا! اگر عشقِ خالق نداري، باري عشق مخلوق پيدا كن تا قدر اين كلمات تو را حاصل شود. دريغا! از عشق چه توان گفتن و از عشق چه نشان شايد داد و چه عبارت توان كرد!»[8]

     هئچ زامان عشق سيز ياشاماميشدير. اونو تات قيزي‌نين عشقي اود ووروب يانديرميشدير:

     اوشتوبون ائيله‌ييب مني تاتي،/ شعريمي ياخشي ائيله‌ييب موزون.

     بيري عيبري دئير، بيري عربي،/ مايل اولدوم زبان تاتي‌يه مون!

     عاشيقم بير نگارِ تاتي‌يه من،/ كي ائدر سئحر نخشبي حئيرون!

 

3- 4. مدّاحليق

     سيد ابوالقاسم نباتي، هئچ بير شاهي و حاكيمي مدح ائتمه‌ميشدير. يالنيز بير قصيده‌سينده «محمد شاه قاجار» دان سؤز ائدير. اودا بونا گؤره‌ديركي مرشد و پيري اردبيللي «نصرت عليشاه»ي تعريف ائتسين. چونكه «محمد شاه قاجار» اونا «صدر الممالك» لقبي وئرميشدير. قصيده‌نين سون بئيتي بئله‌دير:

     سن نباتي دوعاني ائيله تمام،/ نه ايشين وار ائشيتدي شاه يا نه.

 

     و آقاي «احد زماني»نين ديليجه دئسك:«سون بئيت آيدينلاديركي، نباتي محمد شاه ـا مدح گؤنده‌رمير. بلكه حقيقت‌ده اؤز مورادي نصرت عليشاه اردبيلي يا خود صدرالممالكـي اؤيمكده‌دير. آپ آچيق دئمك ايسته‌سك، نباتي بئله محمد شاهي هئچ بيلير:

     ساقيا! باخ بير اول شهنشاها،/ كي ائتدي شاهي ايازا عبد زبون!»[9]

 

     بير يئرده دئيير:

     بير پري پيكر نگارين وصفيني شرح ائيله‌سم،/ ائتمنم من اؤزگه‌لرتك شاه و سولطاندان حديث.

 

     و بو گؤستريركي نباتي مداحليغي و اونو- بونو تعريفله‌مگي، چيركين‌ ايش و گناه ساييرميش.

 

4- 4. آيا نباتي نعمت اللّهي دير؟

     آراشديريجيلاريميزدان بير قيسمي، نباتي‌نين نعمت اللّهي توپلوسونا باغلانديغينا اينانيرلار. نباتي 18 ياشيندا ايكن، نعمت اللّهي‌لرين قطبي «محمد جعفر همداني مجذوب‌عليشاه» تبريزده دونياسين دگيشير و سرخاب خانقاه ـيندا دفن اولور. اونون اؤلوموندن سونرا، نعمت اللّهي‌لر آذربايجاندا ايكي اساس بؤلومه آيريليرلار. بيرينجي بؤلومون باشچيسي «حاج زين العابدين مراغه‌اي مست‌عليشاه» و ايكينجي بؤلومون باشچيسي «صدر الممالك اردبيلي ناصر عليشاه» اولور. ايندي تبريزده ياشايان نعمت اللّهي‌لرين اينانجينا گؤره، نباتي «صدر الممالك»ـي گؤرمك ايچون، اردبيله گئتميشدير و اورادا اونا ارادت الي وئرميشدير و اونو اؤزونه قطب اولاراق، قبول ائتميشدير. ديواني‌نين بير چوخ يئرينده‌ده اوندان آد آپارميشدير. او جمله‌دن آشاغيداكي بئيتلرده دئيير:

     اي دبير نكته پرور، طوطيِ شيرين زبان،/ دم به دم هو- هو چكيب ائت صدر دؤوراندان حديث.[10]

* * *

     مهتر صدر جهان، بير گؤزوقان بير بد مست،/ بير چولاق، بير گؤزوكور، بيرديلي لالا گؤرونور.[11]

* * *

     صدر آفاق، ذوي المسند بزم خاقان،/ بدر خرگاه شهنشاه سكندر دارا.[12]

 

     سندلرده گؤردوگوموز كيمي، «بهجة الشّعرا» مؤلفي اسرار تبريزي‌ده، حكيم سيد ابوالقاسم نباتي‌ني، نعمت اللّهي‌لرين رئيسلريندن حساب ائدير. نباتي‌نين نعمت اللّهي اولماسيني، اونون اؤز ديليندن ائشيدك:

     چند پرسي تو از طريقت ما،/ كوچكْ ابدال شاهِ ماهانيم.

     طالب شاه نعمت اللّهيم،/ سگ كوي عليّ عمرانيم![13]

     * * *

     در كون و مكان مير و شهنشاه علي است،/ حقا، حقا! كه قُل هُوَ الله علي است.

     مشهود و شهيد و شاهد و شاه جهان،/ شك نيست كه شاه نعمت اللّه علي است.[14]

 

     او، ماهان شهريني، «شاه نعمت الله ولي»‌نين اورادا ياتديغي ايچون، قم، كاشان و اصفهان شهرلري ايله‌ده مقايسه ائدير:

     مستانه بيا كه اين ره كاشان نيست،/ از قم بگذر كه منزل مردان نيست!

     مشهور جهان است صفاهان، ليكن،/ در ذوق و صفا چو خطّه‌ي ماهان نيست.[15]

 

5- 4. نعمت الله ولي كيمدير؟

     «سيد نعمت الله ولي» ( 730- 834 هـ .) نين آتاسي «سيد عبدالله» عربستاندان كرمان شهرينه كؤچموش، اورادا ياشاميشدير. سيد نعمت الله همين شهرده دوغولموش و تحصيل ائتميشدير. 24 ياشيندا مكه‌يه گئتميش و 7 ايل «شيخ عبدالله يافعي» ( اؤلوم 768 هـ .) يانيندا قالميشدير. سونرا اردبيله گلميش، «شيخ صفي الدّين اردبيلي» (650- 734 هـ .) نين اوغلو «شيخ صدرالدّين موسي» (704- 794 هـ .) ـيا ارادت الي وئرميشدي. سونرالار خوراسانا گئتميش و «اميرحسين هروي» (اؤلوم 718 هـ .) نين قيز نوه‌سي ايله ائولنميشدير و 775 هـ . ايلينده كرمانا گلميشدير و اورادا «ابن عربي»نين عربجه اثرلريني تقرير و تدريسه باشلاميشدير. او، يوز ايلدن چوخ عؤمر ائتميشدير. اؤزو دئيير:

     قرب صد سال عمر من بگذشت،/ قصد موري نكرده‌ام به خدا!

     نان خود خورده‌ام ز كسب حلال،/ مال غيري نخورده‌ام به خدا!

     به خدا زنده‌ام به حق رسول،/ گرچه از خويش مرده‌ام به خدا![16]

 

     «سيد نعمت الله ولي» يوزه ياخين كيتاب و رساله يازميشدير. اونلارين آراسيندا فارسجا ديواني، عرفان مقاماتي و فلسفي سؤزلري احتوا ائتديگينه گؤره، اؤلوموندن سونرا شاعيرلرين ايلهام قايناغي اولموشدور:

     منم آن رند عاشق مطلق،/ كه اناالحق همي زنم بر حق.

     زورق اندر محيط نيست عجب،/ عجب است اين محيط در زورق.

     لَيسَ فِي الدّار غَيرُهُ دَيّار،/ اوست معشوق و عاشق مطلق. . .

 

     «ابن عربي» اينانجلاريني اثرلرينده تفسير ائدن «سيد نعمت الله ولي»، اؤلوموندن سونرا مريدلري طرفيندن، بير طريقت باشچي‌سي كيمي تبليغ اولوندو و اوغلو «سيد خليل الله» مسند نشين سئچيلدي و بئله‌ليكله نعمت اللّهي درويشلري دئيه بير توپلوم ياراندي و گون به گون چوخالماغا باشلادي. اونلار توركجه و فارسجا شعر عالمينه عارفانه مضمونلار و وارليق بيرليگي (= وحدت وجود) اينانجلاري گتيرديلير.

     ايكي عصر بوندان قاباق، نعمت اللّهي سلسله‌سي‌نين رهبرليگي توركلر الينه كئچميشدير. بيزه اولان ان ياخين قطب «مجذوب‌عليشاه كُووَرنگي همداني» (اؤلوم 1238 هـ .) ديركي «حاج زين العابدين مست عليشاه» (اؤلوم 1253 هـ .) اوندان سونرا قطب مقاميني كسب ائتميش و نباتي‌نين سئوديگي بير پير اولموشدور. بعضي نعمت اللّهي‌لرين نظرينجه اونون شعرلرينده سؤيله‌ديگي «گزگز»دن مقصد، «حاج زين العابدين» دير. گويا اونو سياح اولدوغو ايچون، بئله آدلانديرميشدير.

     ها بئله دئديگيميز كيمي، نباتي‌نين «صدر آفاق» آد وئرديگي، تهراندا «محمدشاه قاجار»ين درباريندا صدارت مقامينا يئتيشيب و لاكين بو مقامدان ال چكيب، نعمت اللّهي درويشلرينه رهبرليك ائدن «صدر الممالك ناصر عليشاه اردبيلي»ده، قطب كيمي تانينير. يوخاريداكي بئيتلردن علاوه، دئيير:

     مست جام صدر آفاقم، قلندر مشربم،/ زيب ايران خطّه‌ي تهراني گؤزلر گؤزلريم.[17]



58 ← 21/ 4- 1

59 ← 22/ 7- 1

60- ديوان فارسي نباتي، ص نه .

61- همان، ص ده .

62- بو مسأله حاققيندا مرحوم دكتر حميد محمدزاده ياغچي و چاغداش تدقيقاتچي رضا همراز تبريزي‌نين گئنيش تدقيقاتلاري واردير.

63- ديوان فارسي نباتي، ص 11.

64- همان، ص ده .

65- عين القضاة، تمهيدات، ص 96 .

66- روزنامه مهد آزادي،13/ 6/ 72 ، احد زماني‌نين مقاله‌سي.

67 ← 15/ 2- 1

68 ← 38/ 5- 1

69 ← 60/ 1- 1

70- ديوان فارسي نباتي، ص 165 .

71- همان، ص 285 .

72- همان، ص 286 .

73- رضا قلي خان هدايت، رياض العارفين، چاپ سنگي،‌ ص 234 .

74 ← 38/ 16- 1

صفحه قبل صفحه بعد
نظر شما
نام : *
پست الکترونیک :
وب سایت/بلاگ :
*
:) :( ;) :D
;)) :X :? :P
:* =(( :O @};-
:B /:) =D> :S
کد امنیتی : *

برچسب ها : سید ابو القاسم نباتی از دیدگاه دکتر حسین محمدزاده صدیق, شناختنامه سید ابوالقاسم نباتی بر اساس پژوهشهای دکتر حسین محمدزاده صدیق,سید ابوالقاسم نباتی به روایت دکتر محمدزاده صدیق, پژوهشهای دکتر حسین محمدزاده صدیق پیرامون سید ابوالقاسم نباتی,تحقیقات دکتر حسین محمدزاده صدیق درباره ابو القاسم نباتی, سید ابوالقاسم نباتی به روایت دکتر حسین محمدزاده صدیق, پژوهشهای دکتر حسین محمدزاده صدیق درباره ابوالقاسم نباتی,
ارسال در تاريخ پنجشنبه 6 مهر 1391 توسط دکتر صدیق. ارسال: سید احسان شکرخدایی