تبلیغات اینترنتیclose
سید ابو القاسم نباتی نین اينانجي و عقيده‌سي - 2 (دکتر حسین محمدزاده صدیق)
سید ابو القاسم نباتی در پژوهشهای دکترحسین محمدزاده صدیق
شرح احوال، افکار و آثار سید ابو القاسم نباتی بر اساس تحقیقات استاد دکتر حسین محمدزاده صدیق
موضوع : اينانجي و عقيده‌سي, | بازدید : 467

 6- 4. آيا نباتي «اهل حق» دير؟

     آذربايجاندا ياشايان اهل حق طايفالاري، اسكي شامانچيلاردان آخيب گلن، اسلامي عرفان ايله قايناييب قاريشان اينانجلارا اينان توپلومدورلار. بو توپلوم و جماعت تبريز، قاراداغ، ماكو، مراغه، زنجان، سلطانيه، همدان، بيجار، گروس و ديگر بؤلگه‌لرده ياشاييرلار. كئچميشده حروفيلرده اؤزلرين اهل حقيقت سايارميشلار. اؤزگرلر ايندي اونلارا مختلف يئرلرده، مختلف آدلار وئريرلر، مثلاً: گوران، علي اللّهي، قيزيل باش، طايفا، شاملو (= شامانلو) و ديگر آدلار. توركجه، اونلارين اعتقادينجا مسلك ديلي دير و بو ديلده يازيلان مقدس كتابلاري كلام آدلانديريلير.

     اسكي شامانچيلار اعتقادي‌نين مركز نقطه‌سي، ذاتين بير- بيري آردينجا ظهور ائتديگي 7 تجلّي‌سيدير. بو تجلي‌لر معبودون گئيديگي لباسا بنزه‌يير و اونا دون  donدئييلير. دون توركجه سؤزدور و بورادا جسد معناسيندادير. بو تجلي‌لر سلسله‌سي مسأله‌سينه دون به دون آدي وئرميشلر. ذات، هر دفعه تجلي ائدنده 4 و جمعاً 5 و يا 40 ملك ايله بيرليكده يئر أوزونده ظاهير اولموش و ياشاميشدير.

     اعتقادا گؤره هم ذات هم ده انسانلار مين بير دوناگيريرلر. اساس اعتقاددا حققين مين بيرينجي دونو «سلطان سهاك» دؤرونده قورتارميشدير و داها گلميه‌جكدير. لاكن ذات مهمان اولاراق بير چوخلارين وجودوندا ظاهر اولابيلر و بير مدت بعضي انسانلارين دونوندا ياشايار[1]. نباتي‌ده اؤزونده مختليف ذاتلارين مهمان اولدوغون ادعا ائدير.

     اهل حققين اساس آئين كتابلاري و كلاملاري توركجه اولموشدور. 24 كلام قوشان گلميشدير، اونلار حق جارچيسي ديرلار. هر بيري مكمل بير ديوان قويوب گئتميشلر. اونلارين باشيندا ايسه «بايرك قوشچو اوغلو» دورور. اهل حق تماميله دئمك اولار كي كيتاب و كلام اهليديرلر. گئنيش بير ادبيات عنعنه‌سينه ماليكديرلر. آمما بو اثرلر حله تدوين اولماميشدير، بلكه تاريخلري‌ده مجهولدور. و تجسّدلرين نه زمان ياشاديقلاري‌دا معلوموموز دگيلدير. مراغه‌نين شماليندا دوغموش و سهند داغي‌نين شمال شرقينده هشته‌ري بؤلگه‌سينده آتش بيگ كندينده دفن ائديلميش «خان آتش» ايكي قرن بوندان اول ياشايارميش. نسلي ايندي 9- نجي گؤبكده «منصور ميرزانين اوغلو» و اودا «عظيم ميرزا» (آقا بخش) ـين اوغلودور. اونلار اونون نسليني «شاه اسماعيل ختايي»يه يئتيريرلر و قطب نامه آدلي كلام‌دا «شاه اسماعيل»ـه توركستان (= آذربايجان) پيري آدي وئرميشلر. آتش بيگلي اينانجلارينا اينانانلار. ايندي نباتي‌ني اؤز معنوي شاعيرلريندن ساييرلار.

     يوز ايللر بويونجا اهل حق بير اينانجلي جماعت كيمي آذربايجان و چئوره‌سينده ياشاماقداديرلار. اونلار ياشاييش احكامي، حيات طرزي و معيشت شيوه‌سي باخيميندان اسلام تاريخي و مدنيّتينه باغلي‌ديرلار. اونلاري انساني اخلاق تاريخينده ان باشي اوجا جماعت حساب ائتمك اولار.

     نباتي‌نين اثرلرينده، اونون بو جماعته باغليليق ايزلريني بير نئچه يئر‌ده تاپماق اولار. مثال ايچون:

     من، روز ازلده سئوميشم بيرشاهي،/ الله! دئير اونا علي اللّهي.

     هر كيم اونا الله دئسه كافردير،/ شكّاكدير اول، نباتي تك، واللّهي!

     هابئله او روحونون دون با دون و قاليبدان قاليبا گزمه‌سي و ظاهيري‌نين اهل حق قيليغيندا اولماسينادا اشاره اولاراق دئيير:

     خان چوباني آدي، نباتي اؤزو،/ بير أوزو قيرخيق، بوغو بورما ايميش.

 

     ولاكين نئجه‌ كي نعمت اللّهي‌لره باغليليغيني صراحتله اعتراف ائتمير، اهل حق اولدوغونودا آچيقجا ديله گتيرمير.

 

7- 4. نباتي، مسلمان و شيعه دير

     منجه، حكيم ابوالقاسم نباتي عارف بير شيعه‌ديركي اؤز زامانيندا بوتون باطيني دوشونجه جريانلارينا داخيل اولموشدور، عشق و صيدق ايله ياشاميش، ظاهيرپرستليك، ريا، اؤزون گؤسترمه، غرور، يالانچيليق و فيريلداقدان اوزاق گزميشدير. نباتي‌نين هم توركجه و هم فارسجا ديوانيندان، اونون مخلص شيعه اولماسينا، يوزلر سند چيخارتماق آولار. آشاغيدا، اونون شيعه‌ليگيني اثبات ائتمه ايچون، فارسجا ديوانيندان بير نئچه رباعي نقل ائديريك:

     شاهنشه جمله اوليا را صلوات،/ آن صاحب تاج اِنَّما را صلوات.

     داماد نبي، زوج بتولِ عذرا،/ ميرِ دو سرا، شيرخدا را صلوات.

     * * *

     آن نادِ عَليِ سَيَنجَلي را صلوات،/ آن شيرخدا، شاه ولي را صلوات.

     بفرست اگر شيعه‌ي مخلص هستي،/ پيوسته ز جان و دل، علي را صلوات.

     * * *

     خورشيد طريقه‌ي هدي را صلوات،/ آن جلوه‌ي نور كبريا را صلوات.

     فرزند علي، حسن، امام ثاني،/ مظلوم و شهيد و مجتبي را صلوات.

     * * *

     آن شَمسِ ضُحي بدر دُجا را صلوات،/ آن نور دو چشم مصطفي را صلوات.

     سولطان خراسان، امام هشتم،/ نور دل مرتضي، رضا را صلوات.

     * * *

     از جان و دل، عباس علي را صلوات،/ آن نور مبين منجلي را صلوات.

     سقّا و علمدار حسين مظلوم،/ آن قوّت بازوي علي را صلوات.[2]

 

     قطعيتله دئيه بيلريك كي نباتي او، اسلام ديني‌نين درين عرفان و حكمتينه يئيه‌لنن مطلق شيعه‌ي اثني عشري جعفري مذهب اولموشدور. اونون بئله بير ايمانلي و درين ايناملي مسلمان اولماسينا هئچ شك ائتمه‌مك لازمدير. ديواني باشدان باشا توحيد سسي و شيعه نفسي دير:

 

     پيغمبر آخرالزّمان را صلوات،/ آن سرو رياض جاودان را صلوات.

     بشمار شمار و عدد جنّ و بشر،/ آن سيد جمله انس و جان را صلوات.

 

     ولاكين نباتي‌نين عظمتي اوندادير كي دين و مذهبينه عشق ايله اينانميش و ياناشميشدير. اونا گؤره‌ده بوتون مسلكلر پيرولري اونو اؤزلريندن سايميشلار.

 

 

8- 4. نباتي‌نين بيليگي

     نباتي‌دن الده اولان ديوان گؤسترير كي او اؤز عصرينده درين بيليك صاحبي اولموش و بير چوخ علملره يئيه‌لنميشدير. «ابوريحان بيروني» قده‌ر رياضياتچي، «ابوالفضل ميبدي» قده‌ر تفسيرچي، «صفي الدين ارموي» قده‌ر موسيقي‌چي، «ملا محمد فضولي» قده‌ر كلامچي و شاعير اولان نباتي، اؤز عصري‌نين «فارابي»‌سي، «ابوعلي سينا»سي و «خواجه نصيرالدين طوسي»سي اولموشدور. «مولوي رومي» قده‌ر اسلام عرفاني‌نين درينليكلرينه جوما بيلن حكيم سيد ابوالقاسم نباتي‌ني، البته كيمسه ايله مقايسه ائتمك نيّتيم يوخدور ولاكين بونو قئيد ائتمك ايسته‌ييرم كي توركجه، عربجه و فارسجاني ياخشي بيلن و هر أوچ ديلده يارانان علمين مختليف ساحه‌لرينه عائد اثرلري اوخويا بيلمك قابليّتي الده ائدن نباتي، خلق آراسيندا حكيم، طبيب، طالع بيلن، منجّم، اديب، شاعير، مفسّر، عارف و ائلجه بيلن كيمي تانينميشدير. اگر اؤز عصرينده دؤلتي امكانلار الده ائده بيلسه ايدي، البته كي «ابوعلي سينا» كيمي، «خواجه نصير الدين طوسي» كيمي، «خواجه رشيد فضل الله همداني»كيمي شاه اثرلر ياراداجاق ايدي. عصرينده‌كي حكومت آداملاري بيليگه و بيلگينه خور باخيرديلار، اودور كي نباتي هئچ زامان «شكسپير» كيمي، «پوشكين» كيمي، «دانته» كيمي، «دكارت» كيمي و «كانت» كيمي گئنيش دونيوي امكانلار الده ائده بيلمه‌دي، اؤز باباسي «فضولي» كيمي مظلوم ياشادي. «نسيمي» كيمي هر امكاندان محروم قالدي و «بايرك قوشچو اوغلو» كيمي اؤز ائلينه، دبلينه و يوردونا باغلاندي، آذربايجاني اؤزونه ايلهام قايناغي سئچدي، اؤز بيليگيني خلقه چاتديرماق ايچون ائلين تركين قيلمادي.

     «بهجة الشّعرا»دا ذكر اولونور كي او، طالبيه مدرسه‌سينده‌ده اولموش و اورادا درس دئميشدير. نباتي‌نين توركجه، فارسجا و عربجه شعر و ديوانلاريندان باشقا، اونون علمي اثرلري‌ده اولموشدور. بو اثرلرين ياخين گلجكده تاپيلمالاريندان سونرا، اونون بيليك ساحه سيني داهادا گئنيش آراشديرماق اولار.

 

 

9- 4. نباتي، كرامت صاحيبي

     هر بير اولو شخصيت كيمي، نباتي‌ده معنوي و ايلاهي درجه‌لرين اوجاذيروه سينه چاتا بيلميشدير. او، دونيادان و بوتون مادي باغليليقلاردان علاقه‌سين أوزموشدور. اطرافيندا كي انسانلارا گؤره چوخ يوكسك سويه‌ده اولدوغو حالدا، قانع و خاضع ايدي.

     اودور كي، يئتيشديگي ايلاهي ذيروه‌ده و اوندا باش وئرن حركتلر و داورانيشلاردا، عادي انسانلاردا تاپيلماين نشانه‌لرده گؤرونوردو.

     او اؤلندن سونرا، اوندان بير چوخ كرامتلر ذكر ائديلميشدير. مثال ايچون ايندي‌ده اوشتوبون و كليبر اطرافيندا دئيرلر كي نباتي طي الارض ائدرميش. آراز چايين اوتايا كئچيب، كيمسه گؤرمه‌دن گزيب- دولانيب گلرميش. حتا آرازچايي أوزرينه سجاده ساليب، نماز قيلارميش!

     بو روايتلرين هاميسي، خلقين اونا بسله‌ديگي درين محبّتدن نشانه‌لردير.

 



75- سيد كاظم نيك نژاد، گنجينه‌ي ياري، تهران، 1370، ص 92 .

76- ديوان فارسي نباتي، ص 275 و 276 .

صفحه قبل صفحه بعد
نظر شما
نام : *
پست الکترونیک :
وب سایت/بلاگ :
*
:) :( ;) :D
;)) :X :? :P
:* =(( :O @};-
:B /:) =D> :S
کد امنیتی : *

برچسب ها : سید ابو القاسم نباتی از دیدگاه دکتر حسین محمدزاده صدیق, شناختنامه سید ابوالقاسم نباتی بر اساس پژوهشهای دکتر حسین محمدزاده صدیق,سید ابوالقاسم نباتی به روایت دکتر محمدزاده صدیق, پژوهشهای دکتر حسین محمدزاده صدیق پیرامون سید ابوالقاسم نباتی,تحقیقات دکتر حسین محمدزاده صدیق درباره ابو القاسم نباتی, سید ابوالقاسم نباتی به روایت دکتر حسین محمدزاده صدیق,پژوهشهای دکتر حسین محمدزاده صدیق درباره ابوالقاسم نباتی,
ارسال در تاريخ پنجشنبه 6 مهر 1391 توسط دکتر صدیق. ارسال: سید احسان شکرخدایی