تبلیغات اینترنتیclose
سید ابو القاسم نباتي‌نين اعتنا ائتديگي شاعيرلر- 2 (دکتر حسین محمدزاده صدیق)
سید ابو القاسم نباتی در پژوهشهای دکترحسین محمدزاده صدیق
شرح احوال، افکار و آثار سید ابو القاسم نباتی بر اساس تحقیقات استاد دکتر حسین محمدزاده صدیق

 4- 5. نباتي و نسيمي

     نباتي‌نين أليميزده كي شعرلرينده «نسيمي»نين آدي چكيلميرسه‌ده، لاكين اونون ايزيني شاعيرين بوتون خلاقيّتينده حس ائديريك. بيليريك كي «حضرت علي» (ع) منقبتلرين هاميدان چوخ، «سيد عمادالدين نسيمي» يازميشدير، عرفاني مضمونلاري و دون با دون عقيده‌سيني ايسه «نسيمي» شعريميزه داخيل ائتميشدير و نباتي بو مضمونلاري ايشلتمكده اونون دوامچيسي كيمي ظهور ائتميشدير. حتي اونون بير چوخ غزللري نسيمي‌نين غزللري‌نين حال و هواسيني داشيير و يا اونلارين استقباليندا يازيلميشدير. ميثال ايچون نباتي گؤزلر گؤزلريم رديفي ايله دؤرد قصيده و بير غزل يازميشدير. همين رديفله نسيمي‌نين بير غزلي واردير:

     قوللوغابئل باغلاديم سولطاني گؤزلر گؤزلريم،/ دردينه توش اولموشام درماني گؤزلر گؤزلريم.[1]

     نباتي‌نين آشاغيداكي بئيتي:

     شد جلوه‌گر جمال تو چون در مثال من،/ در حيرتم چگونه مرا اين جهان گرفت!

     چوخ گومان كي «نسيمي‌»نين منده سيغار ايكي جهان، من بو جهانا سيغمازام مصراعي تأثيري آلتيندا يازيلميشدير.

5- 5. نباتي و قوشچو اوغلو

     قوشچو اوغلو مظلوم و نيسگيللي اولو شاعيرلريميزدن بيري ساييلير. او، هيجري اونونجو عصرده ياشايارميش[2]. بير نهنگ ياراديجيليغا ماليكدير. حروفيه‌نين 24 ايلاهي كلام قوشان شاعيرلري‌نين بيرينجي‌سيدير. نباتي‌نين شعرلري‌نين، «قوشچو اوغلو» ميراثيندان ايلهام آلماسي سؤزسوزدور. او حتي اونون بعضي اصطلاحلارين‌دا شعره داخيل ائدير. ميثال ايچون بو بئيتيني نظره آلاق:

     تؤكموشم ميدانا دورري، گوهري تل ائتميشم،/ بير عجب صاحب نظر صرافي گؤزلر گؤزلريم.[3]

     «قوشچو اوغلو» دئيير:

     من بو سفره واريرام دورلو متاعلار آلماغا،/ تؤكموشم خورده فروشلوق، لعل ايلن گؤوهر آلماغا.

     و يا اونون:

     تالايايديم بو بغدادي، بو بغدادي،/ قالمايايدي هئشجه زادي.

 

     گرايلي‌سي، «قوشچو اوغلو»نون: بو بغداده، بو بغداده عنوانلي مشهور كلامينا نظيره اولاراق يازيلميشدير. بو كلام بئله باشلايير:

 

     ارنلر بير نظر ائيلر،/ بو بغدادا، بو بغدادا.

     پادشاهيم گذر ائيلر،/ بو بغدادا، بو بغدادا.[4]

6- 5. نباتي و فضولي

     نباتي خلاقيّتينده هر شاعيردن چوخ «فضولي» تأثير بوراخميشدي. بونو بوتون نباتي حاققيندا يازي يازانلار قئيد ائديرلر. عشق موضوعو و فلسفي حيات گؤروشو تام «فضولي»دن آلينميشدير. گرچه نباتي هئچ يئرده «فضولي»‌نين آدين چكمير، لاكين اونون بير چوخ تانينميش غزللرين استقبال ائتمكله اونا اؤز حؤرمتين گؤسترير. حتي بعضي شعرلري اونون اثرلرينه جواب كيمي اولاراق يازيلميشدير. مثلاً «فضولي» دئيير:

     اي اسير دام غم بير گوشه‌ي مئيخانه توت،/ توتما زُهّادين مخاليف پنديني،‌ پيمانه توت.

 

     و نباتي اونا جواب اولاراق بئله يازير:

     توتدوم يئنه خوش هنگ ايله مئيخانه‌ني، مئيخانه‌ني،/ ساقي! آماندير دورما، وئر پيمانه‌ني، پيمانه‌ني!

 

     نباتي «فضولي»نين بو مطلعين:

     دوست بي‌پروا، فلك بي‌رحم، دوران بي‌سكون،/ درد چوخ، هم‌درد يوخ، دوشمن قوي، طالع زبون.

 

     بير چوخ يئرده تقليد ائتميشدير. مثلاً فارسجا ديوانيندا دئيير:

     يار بي‌رحم و فلك در سر كين، من بي‌كس،/ چاره آن است كه سر داد در اين ره، باري.

 

     و بير يئرده دئيير:

     راه مشكل، رهنما يوخ، خضر غائب، من غريب،/ رحمي چوخ بير صاحب الطافي گؤزلر گؤزلريم.[5]

 

     او حتي آد ائتمك و آدقيلماق كيمي اصطلاحلاريني‌دا «فضولي»دن آلير:

     گلگيلن سؤز بير ائدك، غيري آرادان گؤتورك،/ جاني جانانا وئرك، دهرده بير آد قيلاق!

 

     نباتي‌نين بو مطلعلي:

     درد دليم ائيلرم درگه سولطانا عرض،/ گر دوشه فورصت، ائديم حاليمي جانانا عرض.

    

     غزلي‌ده، «فضولي»‌نين بو مطلعلي:

     قيل‌صبا كؤنلوم‌پريشان اولدوغون‌جانانا‌عرض،/ صورت‌حالين بو ويران مولكون ائت‌سولطانا عرض.

 

     غزلينه جواب اولاراق يازيلميشدير.

 

7-5. نباتي و صائب

     ادبيات تاريخيميزين نيسگيللي و غريب شاعيرلريندن بيريسي‌ده دهرين اعجوبه‌سي اولان، اونون تايي اينديه‌دك گلمين و گلمه‌سي‌ده بعيد اولان[6] «صائب» آدلي بير شاعير دير. «صائب»ين خلاقيتي باشدان آياغا فرياددير. اونون زمانه اليندن شيكايتي وصفه گلمز درجه‌ده ادبيات تاريخيميزي بوروموشدور.

     نبوغو فوق البشري اولان «صائب تبريزي»نين عظمتي درجه‌سي‌نين يوكسكليگينه بير چوخ عاليم و شاعيرلر اعتراف ائتميشلر. مثلاً «عنوان تبريزي» دئيير:

     عنوان! بسي بلند است معراج فكر صائب،/ كي مي‌توان رسيدن جايي كه او رسيده؟[7]

     «قاسيم مشهدي» يازير:

     سزد ار عقل به شاگردي من فخر كند،/ قاسم امروز كه صائب بود استاد مرا.

 

     و يا «نجات اصفهاني» دئيير:

     بود اين طالع شهرت خداداد،/ كه در دامان مادر طفل نوزاد،

     به خاطر ناگرفته نام مادر،/ كلام صائبا مي‌خواند از بر.[8]

 

     نباتي‌ده اؤز ائلداشي اولان «صائب»ـي سئوير، اونو سيتايش ائدير، اوندان تقليد ائدير، اونا شاگيردليك ائدير و حتي اونون آديني‌دا چكير و اونو چاغيرير:

     محرم خلوت انسم، هاني صائب، صائب!/ لحنه باخ، نغمه‌يه باخ، بولبول شئيدا، شئيدا!

 

     و بعضي شعرلريندن ايلهام آلير. ميثال ايچون «صائب» دئيير:

     گرفتم سهل سوز عشق را اول ندانستم،/ كه صد درياي آتش از شراري مي‌شود پيدا.

 

     و نباتي يازير:

     سهل سانديم عشقي اول، بس دئديم بازيچه‌دير،/ ايندي گل گؤر موجه‌ي توفاني گؤزلر گؤزلريم.

 

     او «صائب»ـي فارسجا ديوانيندا هادي غول عشق آدلانديرير و دئيير:

     حلقه به گوش درش هست چو من صدهزار،/ هست ولي هر كدام هادي غولان عشق.

     هست زايشان يكي، صائب معني طراز،/ كو ست در اين انجمن، طوطي خوشخوان عشق.[9]

 

8- 5. نباتي و واقيف

     هر شاعيردن چوخ، «فضولي» و «واقيف» نباتييه تأثير بوراخميشلار. نباتي، اصلينده «واقيف»ـين يولون ادامه وئره‌رك، خلق ياراديجيليغيندان فايدالانير و عاشيق شعرينه توجه ائدير. او «واقيف» مكتبي‌نين دوامچيسي و اونو ذيروه‌يه يئتيرن بير اولو و مهارتلي شاعير اولموشدور.[10]

     نباتي‌، «واقيف»ين بير چوخ غزللري، او جمله‌دن:

     مهربانليق گؤرمه‌ييب بير مه‌لقادان كوسموشم،/ گونده مين آل ائيله‌ين قلبي قارادان كوسموشم.

     مطلعلي غزلينه جواب يازميشدير. جوابيه‌نين مطلعي بئله‌دير:

     جانا اود ووردوم اؤزوم پروانه‌لردن كوسموشم،/ تا كي مجنون اولموشام ديوانه‌لردن كوسموشم.

 

 

 



85 ← ايضاحلار، 1/ 13- 1

86- بعضي روايتلره گؤره 7- نجي عصرين سونلاري ائلخاليلار دؤورونده ياشايارميش.

87 ← 8/ 14- 1

88- ديوان قوشچو اوغلو، به كوشش ح. م. صديق، تهران، 1364 .

89 ← 5/ 14- 1

90- تعبير، احمد گلچين معاني دندير. باخ ← فرهنگ اشعار صائب، ص سيزده.

91- مجله‌ي دانشكده‌ي ادبيات تبريز، س 11، ص 404 .

92- صائب در نظر بزرگان زمان خود، مجله‌ي دانشكده‌ي ادبيات مشهد، س 5، ش3.

93- ديوان فارسي ← 124/ 6- 1

94 ← گئنيش بيلگي ايچون باخ. ح. م. صديق، واقفْ شاعر زيباي و حقيقت، تهران، نشر پويا، 1351.

صفحه قبل صفحه بعد
نظر شما
نام : *
پست الکترونیک :
وب سایت/بلاگ :
*
:) :( ;) :D
;)) :X :? :P
:* =(( :O @};-
:B /:) =D> :S
کد امنیتی : *

برچسب ها : سید ابو القاسم نباتی از دیدگاه دکتر حسین محمدزاده صدیق, شناختنامه سید ابوالقاسم نباتی بر اساس پژوهشهای دکتر حسین محمدزاده صدیق,سید ابوالقاسم نباتی به روایت دکتر محمدزاده صدیق, پژوهشهای دکتر حسین محمدزاده صدیق پیرامون سید ابوالقاسم نباتی,تحقیقات دکتر حسین محمدزاده صدیق درباره ابو القاسم نباتی, سید ابوالقاسم نباتی به روایت دکتر حسین محمدزاده صدیق,پژوهشهای دکتر حسین محمدزاده صدیق درباره ابوالقاسم نباتی,
ارسال در تاريخ پنجشنبه 6 مهر 1391 توسط دکتر صدیق. ارسال: سید احسان شکرخدایی