تبلیغات اینترنتیclose
سید ابو القاسم نباتي ديواني‌نين بير پارا مضمونلاري
سید ابو القاسم نباتی در پژوهشهای دکترحسین محمدزاده صدیق
شرح احوال، افکار و آثار سید ابو القاسم نباتی بر اساس تحقیقات استاد دکتر حسین محمدزاده صدیق

1- 6. وارليق بيرليگي

     وارليق بيرليگي يا وحدت وجود كشف و شهود اساسيندا قورولور. بو اينانجا گؤره وارليق مابه‌الامتيازي اونون مابه‌الاشتراكي ايله بيردير، ولاكين فرقي بودور كي آللاه وارليغي اصيل (= واجب الوجود) دير و آللاهدان سونرا بوتون وارليقلار ظلّي وجوددورلار. اونا گؤره عارف هر شئيي آللاهين نشانه‌لري حساب ائدير و حقي بو نشانه‌لرده آختارير و اونلاري پرستش ائدير.

     «ابن عربي» فصوص الحكم‌ده دئيير:«عارف اودور كي حقّي هر شئيده گؤرسون.» و بونون آردينجا «حضرت موسي و هارون» حكايه‌لريندن بيريني نقل ائدير و نتيجه آلير:

     «موسي هاروندان داها آييق ايدي. چونكه بيليردي او خلق بيزووي پرستش ائتمكله آللاهي پرستش ائديرلر، چونكه اودا آللاهين نشانه‌سي‌دير و حقّي اوندا گورورلر.»[1]

     ائله بوتا گئوره‌ديركي نباتي دئيير:

     گؤرجك سني من، اي اوزوگول طرّه‌سي سونبول،          ال هاميدان اوزدوم!

     اولدَم كي سنين مئهر روخون ائتدي تجلي،                   عشق اولدو هويدا . . . [2]

     * * *

     طرف گولشنده يئنه بير گول حمرا گؤرولور،/ طُرفه خوش رنگ و تر و تازه و زيبا گؤرونور.[3]

     * * *

     واميق شئيدا گرك تا بيله عذرا نه‌دير،/ طوف بوت ائتمك اولوب راهب و رُهبانا فرض.[4]

 

2- 6. اميدسيزليگي نفي ائتمه

     عارف باشقا مذهبلر، حتي كوفر صاحيبلري‌نين حق قاپيسيندا اوميدسيزليك‌لريني نفي ائدير و بوتون دينلر، مذهبلر و مسلكلري ياخينلاشديرما و بلكه بيرلشديرمگه يؤنه‌لير. بو حاقدا «ابن عربي» دئيير:

     عقد الخلائقُ في الآله عقايداً،/ و اَنا اعتقدتُ جَميع ما عَقَدهُ.[5]

     همين اينانج اساسيندا، نباتي دئيير:

     اي كوثر! ايچون آه چكن زاهد ابله!/ مئيخانه‌ده، گل گؤر، اونو پيمانه‌لر ايچره!

 

     و يا:

     اينجيمه، دور، چال قلم، من سنه قوربان اولوم،/ قويما سؤزو ناتمام، طعنه‌ي اعدايا باخ!

 

3- 6. حلول و اتحاد يا تناسخ

     حلول و اتحادين معناسي بودور كي عارف او قده‌ر اؤزون اونودور، اؤزونو آللاهين وارليغيندا محو و فاني ائدير كي، صفات و افعال‌دا حققين اؤزونه چئوريلير. البته بورادا عين باشقادير و يالنيز آللاها مخصوصدور و باشقا وارليقلار عين الله اولانمازلار، بلكه صيفتلر و فعللرده بئله درجه‌يه چاتا بيلرلر. نباتي‌ده دفعه‌لر بو اينانجي شعرلرينده ديله گتيرير:

     دور! شهر فنا سئيرينه گئت، ترك وجود ائت،               اي عاشيق مشتاق!

     تأثير ائلمز نارا، بلي، آيت و افسون،                          تا اولماسا مكفون.

 

4- 6. حيرت و سرگشته‌ليك

     اونون بير چوخ شعرلرينده،‌ طريقتلر و مسلك آراسيندا سرگردان اولماسينادا اشاره‌لر واردير:

     پر و بال بسته دارم،/ هله! لنگ لنگ لنگم.

     دل زار و خسته دارم،/ هله! لنگ لنگ لنگم.

 

     دئديگيم كيمي «گزگز» سؤزونودا همين طريقت مقاماتي معناسيندا ايشله‌دير.

 

5- 6. نباتي و موسيقي

     نباتي موسيقي بحرلرين و نوالارين تانيان بير شاعيردير. اونون شعرلري‌نين بير چوخوندا موسيقي اصطلاحلاري ايشلنميشدير. مثال ايچون:

 

     مطرب داهي سن شدّ ائله بير نغمه‌ي شهناز.

     اي مطرب خوشخوان ائله بير رقص حُبابي.

     * * *

     صوت داوودي ائيله‌ييم ظاهير،

     گاه حسيني، گهي زمين خارا.

     شور و شهنازدان چكيم آهنگ،

     ناله‌ني ائيله‌ييم بلند آوا.

     گاه مبرقع، گهي نشابوري،

     لحن ادريسي ائيله‌ييم انشا.

 

     نباتي‌نين شعرلري‌نين بير چوخو، درويشلرين عرفاني محفيللرينده موسيقي مقاملاريندا اوخونماق ايچون يازيلميشدير. نباتي اؤزوده، بونا اشاره ائدير و شعرلرين، كلام ( اهل حققين نغمه‌لري) آدلانديرير و بعضي كلام اوخويان‌لارين‌دا آدلارين چكير:

     چاغيرين حسين بالاني، اوخوسون بو خوش كلامي،/ أله بيرده داهي، بالله! بئله خوش زامانا گلمز.

 

     أليميزده اولان / م./ أليازماسيندا بير چوخ شعرلرين باشيندا اونلارين اجرا اولدوقلاري موسيقي بحرلري‌نين آدي‌دا يازيلير. مثلاً أليازماني كؤچورن، بعضي شعرلري غزل و يا روباعي يازديغي كيمي، بعضي‌سين‌ده: كرمي، قاجار، حيدري، باياتِ تورك، كور اوغلو وس. آدلانديرميشدير. بو ايسه بو شعرلرين اجرا اولدوغو موسيقي بحرلري‌نين آدلاريدير. مثلاً ايشيم پئشه‌م اوديانديرماق گرايليسي أوزرينه «كوراوغلو» يازيلميشدير. بو، او دئمكدير كي همين شعر «كور اوغلو» هاواسيندا اجرا اولونارميش.

 

6- 6. نباتي و زاهيد

     نباتي شعرينده، زاهيد، خورافه پرستليگين و رياكارليغين سيمبولودور. اونا خيطاب ائدركن، اونو آخماق، بيليك سيز و يالانچي سايير و حتي حرصله بئله خيطابلاردا ائدير:

     زاهيد أل چك، سني تانري، يئري گئت، دنگ ائلمه!

     عارف اول، عارف، اولما زاهد خشك،/ اختيار ائتمه زؤهد و تقوا هئچ!

     * * *

     او، بورادا قورو مقدس اولماغا قارشي چيخير و انسانلار عارف كيمي ياشاماغا چاغيرير:

     ايچرم قانيني قنداب كيمي، واللّهي،/ تؤكرم جمده گيني ايتلره شيلتا، شيلتا.

     * * *

     اونو بعضاً رياني ترك أتتديگيني گؤرنده‌ده نصيحت ائدير:

     زاهيد! بو نماز تركيني قيلدين قيل،/ بو رسم مجاز تركيني قيلدين، قيل!        

 

     و گاهدا اونون ايمانا گلمگيني تأكيد ائدرك، اونو آلچاق آدلانديرير:

     ائتمز اقرار، نباتي! بو سؤزه زاهيد دون،/ گلمز ايمانا يقين، آندايچه‌سن قرآنه!

     و اونو بصيرت سيز بيلير:

     اي كوثر ايچون آه چكن زاهيد ابله،/ مئيخانه‌ده گل گؤر اونو پيمانه‌لر ايچره!

     * * *

     پرتو انوار حوسنون گؤرسه زاهيد، حق بيلير،/ ترك ائدر فردوسي، ائتمز حور و غيلماندان حديث.

     * * *

     بهشتي زاهيده وئرديم سراسر،/ منيم گولزار رضوانيم علي‌دير!

 

     نهايت او، زاهيدي دونياپرست حساب ائدير و نصيحت كيمي دئيير:

   همّت ائت گئچ بو پوچ دونيادان،/ ائتگيلن جان و مالي ياره نثار.

   سنين اولسون جميع مال جهان،/ منه زاهيد، تمام دير بير يار.

     يار سيز بير خرابه گولخن ايميش،/ صحن بستان و گوشه‌ي گلزار.

   من و ساقي و بحثِ زاهيد دنگ،/ گلدي ناگه نوايا موسيقار،

   دئدي اي مست غمزه‌ي جادو!/ بير سؤزو چوخدا ائيلمه تكرار،

     قوي قدم راه عشقه مردانه،/ گير خراباتا مست و مستانه!



95- تاج الدين حسين خوارزمي، شرح فصوص الحكم، تحقيق آيت الله حسن زاده آملي، قم، 1377، ص 966 .

96←3/ 2- 7

97← 1/ 5- 1

98← 6/ 17- 2

99- يعني: انسانلارين هره‌سي‌نين آللاه حاققيندا بير اينانجي واردير، من بو اينانجلارين هاميسينا اينانيرام!

صفحه قبل صفحه بعد
نظر شما
نام : *
پست الکترونیک :
وب سایت/بلاگ :
*
:) :( ;) :D
;)) :X :? :P
:* =(( :O @};-
:B /:) =D> :S
کد امنیتی : *

برچسب ها : سید ابو القاسم نباتی از دیدگاه دکتر حسین محمدزاده صدیق, شناختنامه سید ابوالقاسم نباتی بر اساس پژوهشهای دکتر حسین محمدزاده صدیق,سید ابوالقاسم نباتی به روایت دکتر محمدزاده صدیق, پژوهشهای دکتر حسین محمدزاده صدیق پیرامون سید ابوالقاسم نباتی,تحقیقات دکتر حسین محمدزاده صدیق درباره ابو القاسم نباتی, سید ابوالقاسم نباتی به روایت دکتر حسین محمدزاده صدیق,پژوهشهای دکتر حسین محمدزاده صدیق درباره ابوالقاسم نباتی,
ارسال در تاريخ دوشنبه 10 مهر 1391 توسط دکتر صدیق. ارسال: سید احسان شکرخدایی