تبلیغات اینترنتیclose
سید ابو القاسم نباتی ديواني‌نين نشره حاضيرلانماسي
سید ابو القاسم نباتی در پژوهشهای دکترحسین محمدزاده صدیق
شرح احوال، افکار و آثار سید ابو القاسم نباتی بر اساس تحقیقات استاد دکتر حسین محمدزاده صدیق

1- 8.  ديوانين قاباقكي ترتيبي

     نباتي هئچ زامان ديوان ترتيب ائتمگه ميل گؤسترمه‌ميشدير. اونون شعرلريني، اوندان سونرا اؤزگه‌لر، مريدلري و شاگيردلري بيريئره توپلاميشلار. اينديه‌دك اليميزه يئتيشن ديواني‌نين أوچ أليازما و ايكي داش باسماسي نسخه‌لري بو روباعيله باشلايير:

     از گردش روزگار و دور گردون،/ ديوان من از رديف گرديد برون.

     آشفته‌تر از شكنج زلف ليلي،/ پژمرده‌تر از مقال حال مجنون.

     هئچ بيريسي‌ده، اسكي ديوان ترتيب وئرمه اصولو كيمي حمديه و نعتيه‌لر ايله باشلامير، بلكه هاميسيندا، بو روباعيدن سونرا آشاغيداكي غزل گلميشدير:

     نيست در اين دفتر بي‌زيب و فر،/ حمدِ خدا، نعتِ رسول، اي پسر!

     در عوضِ بسمِله، در مطلعش،/ كرده رقم منشي كلك قدر:

     سوخت نباتي ز غم هجر يار،/ واي بر آن عاشق خونين جگر!

     هر كه بود عاشق ليلي‌وشي،/ از من دل سوخته گيرد خبر!

     شاد كند خاك مزار مرا،/ با دو سه پيمانه‌ي بي شور و شر.

     آتش بسيار فروزد چنانك،/ طعنه زند شعله‌ي او بر سقر!

     بر لب آتش به كفش جام مي،/ زمزمه‌خوان ز اول شب تا سحر.

     در دل غمديده جز اين آرزو،/ نيست، همين است كه گفتم دگر.

     نو سفران از غم عشق بوتان،/ الحذر و الحذر و الحذر!

      

     بو قارما قاريشيقليق سبب اولموشدور كي مستنسيخلر نباتي‌نين بعضي شعرلرين ايكي يا أوچ دفعه ديواندا يازسينلار و يا بعضي شعرلري ناقيص قئيدائتسينلر.

     نباتي اؤلوموندن بير نئجه ايل سونرا (1267 هـ .) تبريزده نشر اولان ديواني‌دا بئله‌دير. اينديه‌دك نشر اولان «قاسيم‌زاده» و «حسيني»نين علمي نشرلري ايسه سئچيلميش اثرلر ماهيتي داشيميشدير، ترتيب ائدنلر، اثرلري علمي پرنسيپلره اويغون تنظيم ائتمگه چاليشمالاري يئرينده دورسون، ايشده جيددي نقصانلارا يول وئرميشلر.

 

2- 8. ديوانين يئني ترتيبي و سهمانلانماسي

     اوخوجولارين آلينده اولان حاضيركي نشرده اولو باباميز «سيد ابوالقاسم نباتي»نين اثرلرين نظمه‌ ساليب، بعضي ايضاحلارلا نشر ائتمگه چاليشديق. اونون توركجه شعرلرين آشاغيداكي بؤلوملرده تقديم ائديريك:

     1. قصيده‌لر بؤلومونده 23 قصيده،

     2. غزللر بؤلومونده 50 غزل،

     3. قوشمالار بؤلومونده 16 قوشما،

     4. گرايليلار بؤلومونده 10 گرايلي،

     5. بئشليكلر بؤلومونده 10 بئشيكليك،

     6. تجنيسلر بؤلومونده 10 تجنيس،

     7. مستزادلار بؤلومونده 9 مستزاد،

     8. مخمسلر بؤلومونده 2 مخمس،

     9. مسدس بؤلومونده 1 مسدس،

     10. ترجيع‌بند بؤلومونده 1 ترجيع بند،

     11. مثنوي بؤلومونده 16 بئيتلي 1 مثنوي،

     12. بحر طويل بؤلومونده 1 بحر طويل،

     13. ملمع بؤلومونده 1 ملمع،

     14. روباعيلر بؤلومونده 57 روباعي،

     15. دو بئيتيلر بؤلومونده 6 دو بئيتي،

     16. تك بئيتلر بؤلومونده 5 تك بئيت،

 

     مجموعه‌يه داخيل ائتميشيك. البته سيد ابوالقاسم نباتي نين بوتون اثرلرين كشف و نشر ائتمك ادعاسيندا اولا بيلمريك. لاكين اليميزه چاتان تام و كليه اثرلرين گونش ايشيغينا چيخارتما ادعاسين ائديرك. باش ووردوغوموز قايناقلاردان اولدوقجا استفاده ائتميشيك.

 

3- 8. بؤلوملر و ديليملر

     حؤرمتلي اوخوجولارين راحات كيتابدان استفاده ائده بيلمه‌لري و نباتي خلاقيتي ايله سورعتله تانيش اولماقلاري و اولو شاعيريميزين ياراديجيليغيندا يئني آختاريشلار يوللارين هامارلاماق مقصديله، الينيزده اولان مجموعه‌ني 23 بؤلومده تقديم ائديريك. هر بؤلوم بير نئچه ديليم و هر ديليم بير نئچه كلاما تقسيم اولموشدور. وئرديگيميز ساي اشارتلرينده هر بؤلومون ساييسين. سول طرفده يازميشيق و بير تيره خطيندن سونرا او بؤلومه عائيد هر هانسي بير ديليمين نمره‌سين ذكر ائتميشيك. بير مميّزدن سونرا ايسه او ديليمدن آيريلميش هر بير كلامين نمره‌سيني قئيد ائتميشك.

     مثال ايچون 2/ 2- 19 اشارتي‌نين آنلامي بئله‌دير: 19 سايي، كيتابين 19- نجو بؤلومو، 3 عددي او بؤلومون 3- نجو ديليميني و 2 عددي او ديليمين 2- نجي كلاميني گؤسترير. اوخوجو بو ساييني گؤردوكده، كيتابيميزين 442- نجي صحيفه سينده كي يازيني اوخوياجاقدير.

     قئيد ائتديگيم كيمي اولو شاعيريميزين ادبي ياراديجيليغيني 17 بؤلومده تقديم ائتديك. ديوانا اضافه ائتديگيميز مقدمه‌دن باشقا، علاوه‌لرده:

  1. 17- نجي بؤلومده أليازمالاردا اولان نسخه فرقلريني و واريانتلاري سيرالاديق.
  2. 18- نجي بؤلومده نباتي ياراديجيليغيندا – خصوصيله قصيده‌لرينده ايشلنن بعضي عيباره و اصطلاحلاري امكانيميز داخيلينده شرح ائتديك.
  3. 19- نجي بؤلومه نباتي حاققيندا نباتي شيناسلارين نظرلرين توپلاديق.
  4. 20- نجو بؤلومده نباتي اثرلري‌نين أليازمالاري، نشرلري و نباتي حاققيندا يازيلان كيتاب و مقاله‌لري معرفي ائتديك.
  5. 21- نجي بؤلومده سون سؤز عنوانيله، تخميناً ايگيرمي ايل قاباق واقيف، شاعير زيبايي و حقيقت آدلي كيتابيمدا نباتي حاققيندا يازديغيم يازي‌نين آذربايجانجاسين وئرمك بهانه‌سيله اولو شاعيريميزين مبارك آدي‌نين بركتيله، أورك سؤزلريمي اؤز اوغوللاريما خيطاب ائدرك اوخوجولاريملا اورتايا قويدوم.
  6. كيتابين 22- نجي بؤلومو فهرستلر آدلانير. بو بؤلومده /ح./ نشرينه آرتيرلان نباتي شعرينده ايشلنن صوفيانه اصطلاحلاري قيسميني، اوندا اولان جدي نقصانلار و حتي الفبا سيراسيله دوغرو ترتيب ائديلممه- سينه باخماياراق، مرحوم «حسيني»نين خاطيره‌سين عزيز توتماق و نباتي ديوانين نظمه سالماق اوغروندا بيرينجي دفعه چاليشماغا باشلاماسي ايچون، /ح./ نشرينده اولدوغو كيمي، آرتيريب اسكيلتمه‌دن، بيرديليم اولاراق تقديم ائتديك.

 

     بو بؤلومون سون ديليمي كيتابين كشف الابياتـي آدلانير. اوميدوارام بو ديليم اوخوجويا نباتي اثرلرين كيتابيمدا راحات تاپماقدا يارديم ائتسين. ديليم، كتابين بوتون رمزلريله ترتيب ائديلميشدير و الينيزده اولان كيتابين تام بير گؤستريجي و گوزگوسودور. ها بئله 9 ديليمده وئريلن مختليف فهرسلرده نباتي ديوانيندا ايشلنن بير چوخ آيه‌لر، توركو اصطلاحلار، قبيله‌لر، كيتابلار، يئرلر، شخصلر، گوللر، چيچكلر و قوشلار آدلارين و بو كيمي عنوانلاري احتوا ائدير. بو فهرستلرين طريقيله، نباتي خلاقيّتينده تدقيق ائتمك ايستينلر، بير چوخ فاكتلارا أل تاپا بيلرلر.

     فهرستلرده هر آدين اؤنونده يالنيز رمزي اشاره‌لر وئريلميشدير. مثال ايچون: 478- نجي ديليم و 1- نجي كلام دئمكدير، بو ايسه كيتابيميزين 62- نجي صحيفه‌سينه تصادف ائدير. يالنيز 487- نجي صحيفه‌ده قئيد اولونان 11- نجي فهرسته، عنوانلار اؤنونده كيتابيميزين صحيفه نمره‌لرين ذكر ائتميشيك.

     كيتابين منظم بؤلوم و ديليملرده تقديم ائتديگيمزدن مقصد بيرينجي نؤوبه‌ده عادي اوخوجونون، ايسته‌ديگي مطلبه تئز أل تاپماسينا و ايكينجي درجه‌ده نباتي شعرينده تدقيق ائتمك ايستين علم خاديملرينه يارديم ائتمكدير. نباتي خلاقيّتينده بو كيمي موضوعلاري آيريجا كيتابلار حاليندا تدقيق ائتمك اولار:

  1. نباتي شعرينده «حضرت علي» (ع) صيفتلري و سؤزلري.
  2. نباتي‌نين باطيني عقيده‌لري‌نين هرطرفلي ايضاحي.
  3. نباتي ديلي‌نين گرامري.
  4. نباتي خلاقيّتينده «حافيظ شيرازي‌»نين ايزلري.
  5. نباتي- «واقيف» مكتبي‌نين تشريحي.
  6. نباتي‌ده «فضولي» تأثيري‌نين گئنيش تصويري.
  7. نباتي‌ده «نسيمي» تأثيري‌نين گئنيش تصويري.
  8. نباتي و صفويه دؤورو ايرانين توركجه يازان شاعيرلريني بيري بيرلرينه باغلايان عقيده‌تي باغلار و ديل بيرليگي.
  9. نباتي‌نين هيجري 13- نجو عصر ادبياتيميزداكي تأثيري‌نين گئنيش ايضاحي.

 

     بو موضوعلار و اونلارا بنزه‌ر داها باشقا موضوعلار واردير كي هر بيريسي أوزه‌رينده آغير امك صرف ائدرك، بؤيوك بير كيتاب ايشلمك اولار. تأسفله قئيد ائتمك لازمدير كي ايراندا حله‌ليك هئچ بير دانشگاه و عالي مكتبلرده ديل و ادبياتيميز اوخونوب تحليل اولونمور لاكين هر بير عاليم وطنداشا ديل و ادبياتيميزي گئنيشلنديرمك و نباتي كيمي اينجيلري أوزرينه خصوصي علمي تدقيقات آپارماق بير وطنداشليق و ائلداشليق بورجودور. من اوميدوارام عاليميلريميز و طلبه‌لريميز توصيه ائتديگيم موضوعلاردا تدقيقات ايشلرينه باشلاياجاقلار. ايندي نباتي ديواني‌نين علمي و ادعاميزا گؤره نيسبتا دوزگون متني‌نين أللرده اولماسي بو بورجو اؤده‌مگه جوان و انقلابچي عاليملر و دانشجولاريميزا يارديم ائده‌جكدير.

 

4- 8. املاء مسأله‌سي

     املاء مسأله‌ميز ايندي تأسفله بورو اؤشوق و قاريشيق بير مسأله كيمي قارشيميزدا دوروبدور. انقلابدان قاباق خائن پهلوي رژيمي‌نين ديل سياستي ايله مبارزه ائدن آذربايجان گنجليگي املاء‌ميزين سنتي قايدا- قانونلارينا اساسلاناراق، علمي بير شيوه‌ آراييب تاپماغا چاليشيردي[1]. انقلابدان سونرا، ايران اسلام جمهوريسي‌نين قرآن احكامينا داياناراق ديللرين يازيب اوخوماسين آزاد بوراخديقدان سونرا، بير چوخلاري ديليميزده يازيب يازاتماغا باشلاديلار.

     50 ايل اؤزديلين يازيب اوخويا بيلمين خلقين مختليف صينيفلري قلمه أل آپارديلار. املاء‌گر گينليگي، سليقه اعمالي، لهجه و شيوه‌يه اصالت وئرمه نظريه‌لري و بو كيمي قارماقاريشيق حاللار چيخدي. بعضيلرده مسأله‌ني اؤزلرينه شؤهرت نردواني ائتديلر و يئرسيز بدعتلر ياراتماقلا داهادا املاءميزي چتينلتمگه باشلاديلار. ديليميزده يازيب ياراتما قابليتي‌ني گويا يوخاري صينيفلره منسوب اولدوغون، ديلده‌ده دئمسه‌لر، عملده اؤنه سوردولر. املاءميزي مختليف سليقه‌لردن نجات وئرمك و كلمه شكيللرين، دوغرو- دوزگون و واحيد بير شكله گتيرمك، هاميميزا وطنداشليق بورجودور. لاكين مادام كي مدرسه‌لريميز آچيلماييب و ايرانين اساس و اصلي ديللريندن اولان آذري توركوسو ايله درسلر رسمي شكيلده اوخونماييب و دانشگاهلاردا تورك ديلي و ادبياتي بؤلوملري آچيلماييبدير، بو گرگينليك قاچينيلماز اولاجاقدير. حاضيركي كيتابيميزدا گرچه بعضاً املاءنين ثابيت قايدالاري. پوزولور، لاكين عموميتله كيتاب بو سطيرلري يازانين املاءميزي سنت و عنعنه‌لريميزه اساسلاناراق راحاتلاشديرماسي حاققيندا توصيه‌لري اساسيندا تقديم ائديلميشدير.

     تأسفله قئيد ائتمك لازمدير كي حله‌ده عربجه و فارسجا سؤزلرين، توركجه‌ميزده تلفظلرينه اساسلاناراق نئجه يازيلماسي ايچون ثابيت بير قراراگله بيلمه‌ميشيك. بو، آجي بير اعترافدير. لاكين هر يئرده، بو كيتابدا، يالنيز اوخوجونون راحات اوخويا بيلمه‌سين نظره آلاراق، كلمه‌لرين يازيليش فورماسين، بعضاً دگيشديك:

  1. دخيل فارسجا و عربجه سؤزلري امكان داخيلينده اولدغو كيمي يازيريق. بو سؤزلره ايرانداكي آذربايجانليلارين گؤزلري عادت ائتميشدير. آذربايجان جمهوريسي مسلمانلاري ايسه اسلامي سؤزلري تانييرلار. بئله اولدوقدا يالنيز بعض صائتلري آرتيراراق، دخيل سؤزلري، امكان داخيلينده، اصل ديلده اولدوغو كيمي يازيريق. مثال ايچون: عالم (= دونيا)، عاليم (= بيليجي)، قابيل، موفقيت، كؤمك، تنقيد، سيلاح، تهلكه، سياست، لوطف، حوسن و . . .
  2. سؤزلري توركوموزون ادبي فورماسيندا يازماغا چاليشيريق و توركجه كؤكلو سؤزلري، خصوصيله فعللري ولايتي شيوه‌ده و مختلف شهرلر و كندلرين لهجه‌سينده يازميريق. مثال ايچون: ايليوب يئرينه: ائيله‌ييب، آچوغدو يئرينه: آچيقدير، باغرونه يئرينه: باغرينا يازيريق و . . . بئله اولمازسا، كلمه‌لر واحيد شكل آلا بيلمز.
  3. لازم اولدوغو يئرده كسره (E/e ) ني ائـ ، ئـ ،‌ ة شكيللرينده گؤستريريك. مثل ايچون: ائل، دئمك، يئر، دة، ية و . . .
  4. لازم اولدوغو يئرده فتحه (ə/ə )ني أ، ه، ـه ايله گؤستريريك، لاكين اگر بو حال لازم اولمايان يئرلرده ده ايشله‌ديلسه، املاميزي قارماقاريشيق حاللارا سالابيلر. اودور كي بو جهته چوخ احتياطلا ياناشمالييق و لازم اولمايان يئرلرده، ايشلتممه‌لييك. يازيچيلاريميز اؤز شخصي تفنن و سليقه‌لريني عموم اوخوجولارا تحميل ائتممه‌ليديرلر. مثال ايچون: أورك شكليني هر كس دوزگون اوخوياجاقدير، اونو أوره‌ك فورماسيندا يازماق لازم دگيل.
  5. ضمة خفيه (ö/O) ني قاباقكي عاليملريميز باشدا اؤ كيمي و اورتادا ؤ كيمي يازميشديرلار. بو گؤزل و مثبت عنعنه‌دن تبعيت توصيه اولونور. مثال: اؤلكه، بؤلگه، سؤز، گؤز، دؤرد، اؤنلوك و . . . عاليملر، ضمه خفيه‌ني هئچ زامان باشدا او كيمي يازماميشلار. ديليميزين قايدالاريندان خبردار اولانلار و عنعنه‌لريميزي تانيانلار هميشه اؤ شكلينده يازميشلار.
  6. ضمه‌ خفيفه‌ (ü/U)ني سؤزون باشيندا أو شكلينده يازا بيلريك. مثال: أورك، أوزمك، أوستون، أوشومك، أوشونمك و . . .
  7. بئله‌ليكله او نشانه‌سي يالنيز ضمه (O/o) نين اؤزو و ضمه‌ي وسيعه (U/u) ايچون ايشله‌ديلير. 5- نجي و 6- نجي ماده‌لره وئرديگيميز توصيه‌لر او شكلي‌نين يوكون آزالدير. اونا دؤرد يوك يئرينه ايكي يوك چاتير. بو ايسه تام مقصده اويغوندور.

 

     بيز ايندي اسلامي و قرآني الفبا ايله يازماغا يئني باشلاديغيميز بو افتخارلي ايللرده، دونيا مسلمانلاري‌نين ايران اسلام جمهوريسينه گؤز تيكديكلري زاماندا، ديليميزين ادبي فورماسين ياخشي منيمسه‌لي، املاءميزي ياخشي اؤيره‌نملي و ديل قايدالارينا چوخ دقت و تعصب گؤسترره‌ك عمل ائتمه‌لييك.[2]           

 

5- 8. قيسّالتمالار

     كيتابيميزدا آيريجا قيسّالتمالار بؤلومو آچماديغييز ايچون، بورادا قيسّالتمالارين و اشارتلرين سياهيسين تقديم ائديريك:

     اشارت                                             معنا و وظيفه‌سي

 

     ←               رجوع ائدين، باخين.

     -                 بؤلوم ساييندان سونراديليم سايين گؤسترير. مثال: 2- 11 ، يعني: آنلاميندادير. سؤزون                            ايضاحيندان قاباق قويولور.

     /  /               آرتيريلان هر هانكي بير سؤزو و يا اشارتي احتوا ائدير.

     (=                هم معنا و مترادف سؤزدن قابان قويولور. مثال: حوسن (= گؤزلليك).

     ( )                هر جوره ايضاح ايچون.

     « »               خصوصي نظرده توتولان آدويا اصطلاحلاري گؤسترير.

     /                  ايكي سؤزو و يا عددي بيري- بيريندن آييرير. و ديليم ساييندان سونرا كلام سايين                               گؤسترير. مثال: 2/ 18- 1.

     / ا./ :             كتابفروشي ادبيه نشري. (← 1/ 3- 19 )

     ج:                 جيلد.

     /چ./ :             چليپايي أليازما. (← 3/ 4- 19 )

     /ح./ :             ابوالفضل حسيني نشري. (← 2/ 5- 19 )

     ح:                 حاشيه.

     /د./ :             دانشگاه تهران أليازماسي. (← 2/ 4- 19 )

     س:               ساي، نمره.

     ش:               هجري شمسي.

     ص:               صلي الله عليه و آله، پيغمبر آديندان سونرا.

     ص:               صحيفه.

     صص:            صحيفه‌لر.

     ع:                 عليه السلام.

     /م./ :             مجليس شوراي اسلامي أليازماسي. (← 1/ 1- 19)

     هـ . ق           هجري قمري.

 

6- 8. دوعالار و تشكرلر

     «حكيم سيد ابوالقاسم نباتي»نين اثرلري‌نين علمي- تنقيدي نشريني حاضيرلاماق و نشر ائتمك، گنجليك ايللريمدن منده بير آرزويا چئوريلميشدير. 1371- نجي ايلده بو آرزو گئرچكلشدي، اونون شعرلريني ايكي جيلدده، ديوان تركي و ديوان فارسي آدي ايله، نشر ائتديره بيلديم. كيتابين نشريندن سونرا، چوخلو تشريفلر، مصلحتلر و يارديملار ايله أوز- أوزه گلديم. علمي ايشيمي يئنيدن ايشله‌ييب ايكينجي نشره حاضيرلاركن آقالار: سيد احسان شكرخدايي، رضا همراز، احد زماني، سيد حيدر بيات، علي ملازاده، اسماعيل هادي، صمد آسيابي و كريم باوفا يارديملاريني مندن اسيرگمه‌ديلر. اوميد ائديرم ديوانين بو گؤزل بيچينده نشري، گله‌جك تدقيقاتلارا يئني يوللار آچسين.

 

 

                                                                        ح. م. صديق

                                                                        تهران- دي ماه 1384



110- نمونه ايچون 1347 ش. ايلينده نشر ائتديگيميز «مهد آزادي ويژه‌ي هنر و اجتماع» و اوندان قاباق نشر اولان «مهد آزادي آدينه» هفته‌ليكلرينده همين شيوه ابداع و اعمال اولونوردو.

111- سهند هفته‌ليگي، ساي 25، بو سطيرلي يازانين اوخوجولارلادانيشيق عنوانلي يازيسي. و يئني يول هفته‌ليگي، 42/ 4 .

صفحه قبل صفحه بعد
نظر شما
نام : *
پست الکترونیک :
وب سایت/بلاگ :
*
:) :( ;) :D
;)) :X :? :P
:* =(( :O @};-
:B /:) =D> :S
کد امنیتی : *

برچسب ها : سید ابو القاسم نباتی از دیدگاه دکتر حسین محمدزاده صدیق, شناختنامه سید ابوالقاسم نباتی بر اساس پژوهشهای دکتر حسین محمدزاده صدیق,سید ابوالقاسم نباتی به روایت دکتر محمدزاده صدیق, پژوهشهای دکتر حسین محمدزاده صدیق پیرامون سید ابوالقاسم نباتی,تحقیقات دکتر حسین محمدزاده صدیق درباره ابو القاسم نباتی, سید ابوالقاسم نباتی به روایت دکتر حسین محمدزاده صدیق, پژوهشهای دکتر حسین محمدزاده صدیق درباره ابوالقاسم نباتی,
ارسال در تاريخ دوشنبه 10 مهر 1391 توسط دکتر صدیق. ارسال: سید احسان شکرخدایی