تبلیغات اینترنتیclose
سید ابوالقاسم نباتی ایله ایلگیلی سندلر و قئیدلر- 1 (دکتر حسین محمدزاده صدیق)
سید ابو القاسم نباتی در پژوهشهای دکترحسین محمدزاده صدیق
شرح احوال، افکار و آثار سید ابو القاسم نباتی بر اساس تحقیقات استاد دکتر حسین محمدزاده صدیق
موضوع : سندلر و قئیدلر, | بازدید : 651

حكيم سيد ابوالقاسم نباتي‌نين ياشاييشي، شخصيتي، دوشونجه‌لر ي و ياراديجيليغي حاققيندا، هم يازيلي كلاسيك سندلر، همده بير نئچه تدقيقات اثري موجوددور. بونلارين آراسيندان، بعضيلرينه آشاغيدا اشاره ائديريك:

1- 1. الذّريعة

     «شيخ آغا بزرگ تهراني» عربجه يازديغي الذّريعه دائر‌ةالمعارفينده، نباتي حاققيندا دئيير:

     « . . . و اسمه السيّد ابوالقاسم بن السيّد محترم الاشتبيني، من محال قراجه داغ. ترجمه تربيت في ( دجا- ص 370) و ذكر انه هاجر من مسقط رأسه الي اهر و اشتغل هناك في بقعة الشيخ شهاب الدين بالرياضات و المجاهدات و في الاواخر عاد الي مسقط رأسه و بها توفي 1262 ، و مرّ في ص 968 تخلصه الآخر مجنونشاه و ديوانه موجود في (المجلس) كما في فهرسها 3: 434، و عند (فخر الدين). طبع له بحر طويل علي هامش ديوان فضولي، و طبع ديوانه بالفارسيه و التركيه بتبريز 1324 في  135 ص[1]

 

2- 1. بهجة الشّعرا

     اسرار تبريزي فارسجا يازديغي بهجة الشّعرا اثرينده نباتي‌دن آد آپارير و يازير:

     «مولانا نباتي شمس ولايت معرفت، قمر آسمان حكمت، در عصر خود، رئيس سلسله‌ي شاه نعمت اللهي بود. اكثر اوقات نقاب به چهره، چون آفتاب انداختي . . . نگارنده‌ي اين اوراق، در حالت جلياني در مدرسه‌ي طالبيه به شرف حضور آن بزرگوار رسيدم، دست مباركش بوسيده، ايستادم. به پايش خوانده، دست بر سر نهاده، فرمود: "ان شاء الله پير كاميل اولاسان!" و در واقع، هر چه يافتم از پا تا سر، نفس آن جناب است.»[2]

 

3- 1.  ريحانة الادب

     مرحوم «مدرس تبريزي‌»نين اونون حاققيندا دئديكلري:

     «. . . سيد ابوالقاسم نباتي، سيد محترم اوشتوبوني‌‌نين اوغلو، هيجرتين اونونجو عصر عاليملريندن ساييلير. مسلكي درويشليك، مشربي صوفي‌ليك ايدي. آذربايجان توركجه‌سي و فارسجا چوخ ذؤوقيات شعرلري قوشموشدور. نباتي، خان چوباني و مجنونشاه تخلّص ائدردي. ديواني دفعه‌لر تبريزده چاپ اولموشدور . . .

     اوشتوبون، تبريز ناحيه‌لريندن اولان قاراداغدا بير كنددير. اوشاقليغين اورادا كئچيرن نباتي، گنجليگينده او ناحيه‌نين مركزي اولان اهره گلميش، شيخ شهاب الدّين بقعه‌سينده بير مدت رياضته مشغول اولموشدور. عؤمرونون سون ايللرينده، يئنه‌ده اوشتوبونه دؤنموشدور. هجري 1262 ايلينده اورادا وفات ائتميشدير.»[3]

 

 

4- 1.  دانشمندان آذربايجان

     «سيد ابوالقاسم نباتي، مرحوم سيد محمد اوشتوبونلو‌نون خلفي، درويش مسلكلي و صوفي مشربلي ايدي، گاه مجنونشاه و گاهدا خان چوباني تخلص ائدردي. قاراداغين ديزمار ماحالي‌نين مركزي اولان اوشتوبون كندينده بويا- باشا چاتميش، بؤيوينده اهره كؤچموش، شيخ شهاب الدين بقعه‌سينده رياضت و مجاهيدته مشغول اولموشدور. عؤمرونون سونوندا يئنه دوغولدوغو يئره كؤچموش، هيجري 1262 ايلينده رحمته گئتميشدي. مزاري اورادا دير. مولانا نباتي، خواجه حافظ شيرازي‌نين شعرلرين تتبّع ائتميشدير. چوخ تجنيس جينسينه رغبت گؤسترميشدير. بعضيلرين چوخ گؤزل دئميشدير. توركجه شعرلري كوردي، كرمي، قاراكهر و گرايلي، هاوالارينا اويغوندور.»[4]

 

 

5- 1.  عبدالعلي نصفت (شائق)

     «. . . نباتي شعري‌نين خصوصيتي، اوندا اولان صفا و صميميّتدير. اونون ياراديجيليغيندا روحسوز اثر گؤزه دگمير. غزللري فلسفي ماهيت داشيير. شعرلري غمدن كدردن اوزاقدير.

     نباتي ياراديجيليغيندا فضولي، حافظ و مولوي روحو واردير. لاكين هئچ زامان اونلاردان تقليد ائتمه‌ميشدير. آهنگلي وزنلر و بحرلر سئچمكده خاص مهارت گؤسترميشدير. اونون هر بير غزلينده، مختلف دوشونجه‌لر و رنگارنگ سبك و شيوه‌لر گؤرسنير. كؤهنه مضمونلاردان اوزاق، يئنيليگه يؤنلن شاعير، «فضولي» كيمي غزللرينده فلسفي و عرفاني مضمونلار بيان ائدير.

     نباتي عؤمرونون ايلك دؤورونده صوفيليگه أوز گتيرميش و سونرا شيعيليكده پا برجا اولموشدور و مولاي متّقيان حضرت علي (ع) حاققيندا قصيده‌لر يازميشدير. بعضي زامانلاردا ياردايليش عظمتي اؤنونده حيرت و دوشونجه سرگردانليغينا دوچار اولموشدور.»[5]

 

6- 1.  فريدون كؤچر‌لي

     «. . . آذربايجان توركلري‌نين مقتدر شاعيرلريندن بيريسيدير. سيد ابوالقاسيمين وطني، قاراجاداغدا اوشتوبون ياخود اوچ ديبين قريه‌سيدير كي، ايران دؤولتينه متعلق دير و موغان صحراسينا ياخيندير. بو قريه‌نين آب و هواسي معتدل و تورپاغي منبت‌دير. اهاليسي سلامت و كارگوذار اولدوغو ايچون مرفّه حال ياشاييرلار. ولي زمانه‌نين اوضاع اقتضاسيندان بي‌خبر و علمدن بي‌بهره ديرلر. نئجه كي دولت عليه‌نين رعيتلري و رنجبرلري تماماً بو حال أوزره ياشاماقداديرلار.

     . . . مرحوم، زياد متقي ديندار و پاكدامن بير وجود اولوب، عؤمرونون چوخونو زؤهد و رياضتده كئچيرميش. رياضت اهلي اولدوغو ايچون، اكثر اوقات دونيا ايشلريندن أل چكيب و خلقدن قطع علاقه ائديب اعتكافا أوز گتيرميش. بو اعتكاف و زاويه نشينليگي اؤزو ايچون بؤيوك بير سعادت حساب ائديب، حقيقت عالمينه ايريشملي و نيهان سرّلريندن اطلاع كسب ائتمگي محض وحدت گوشه‌سينده بولارميش.

     . . . اعتكافدان فارغ اولدوغو زامان، گاه بير جماعت آراسينا چيخيب صحبت ائدرميش. زياده فصيح و شيرين زبان اولدوغو ايچون، چوخلاري اؤزونه واله و حيران ائدرميش و معاصيرلريندن بير چوخو اونونلا مكالمه‌يه داخيل اولماغي و اونون صحبتيندن استفاده قيلماغي اؤزلرينه بؤيوك بير فيض و غنيمت حساب ائدرلرميش.

     روايت اولونور كي سيد ابوالقاسم اوشتوبونده اوّلجه درويشلر حلقه‌سينده داخيل اولوب، اونلارين ايچينده نفوذو آرتيريب و سونرالاردان درويشلره مرشد اولوبدور. بعضي واختلاردا، اوندان كرامت صادر اولارميش، بئله كي بير پارا خارق العاده علامتلرين اوندان ظهور ائتمگيني گؤرنلر اولوبدور.

     اعتكافدان چيخان زماني، اونون سيماسيندا باشقا بير پارلاقليق و نورانيّت جيلوه ائدرميش، اؤزگه بير حالته دوشرميش و بعضي واخت، شؤوق و ذؤوق ايله جوشه گليب عشق‌دن، مئي و محبتدن دم وورارميش.

     . . . نباتي آرتيق درجه‌ده سخي، جومرد و نجيب بير وجود ايميش. آتاسي داخي محترم سيّدلردن ايميش.

     . . . نباتي، حضرت علي عليه السّلامين حقيقي و صميمي مداحلاريندان اولدوغو ايچون، او جنابين وصف شأنينده چوخ گؤزل و غرّا قصيده‌لر يازميشدير. . . نباتي، دئمك اولار كي اؤز مولاسينا أوركدن عاشيق ايميش و بو محبتي اوجوندان، او شاه دريا دلين و گؤوهر نجف و معدن عز و شرفين مدحينده يازديغي كلاميندا اندازه‌دن چيخير . . .

     . . . نباتي‌نين حضرت علي شأنينده يازديغي توركو قصيده‌لري داخي صميم قلبدن نشأت ائدن پاكيزه و حقيقي حيصّه‌لر دير كي اوخوجولارا آرتيق درجه‌ده تأثير ائدير.

     . . . سيد ابوالقاسم، آذربايجان توركلري‌نين خواجه شمس الدين حافيظـي و شمس تبريزي سي و بعضي مقاملاردا مولانا جلال الدين رومي‌سي منزله‌سينده‌دير. نئجه‌كي حافظ، فصاحت و بلاغتده شعراي فارسين سر دفتري اولوب، همچنين نباتي ده آذربايجان شعراسي‌نين فصيحراقيدير . . .

     . . . معلومدور كي خواجه حافيظ، شيخ سعدي و جلال الدين رومي كيمي نصيحت آميز تمثيل و حكايتلر يازماقلا بئله، اونلاردان حصه‌ئي اتّخاذ ائتمه‌ييبدير. آنجاق معناجا بير- بيرينه مناسبتي اولمايان غزللر واسطه‌سيله، حسّيات طبيعيّه‌سيندن و كمالات معنويّه‌سيندن ناشي حكمت‌آسا و معجزنما شعرلر ياراديبدير. هر شعرين و هر بئيتين تكليكده درين معناسي‌وار. هر بير كلمه‌سي بؤيوك نصيحتدير. طرز كلامدا و شيوه‌ي ليساندا اوقده‌ر حلاوت و فصاحت وار كي، اهل حال اونو مطاليعه ائتديكده واله اولور، دِماغي باشقا بير ذؤوق ايله وصفه گلمين بير فئيض ايله دولور. نباتي داهي بير مطلبين أوستونده دايانيب دورمور، پند و نصيحت دئمكدن و خلقه يول گؤسترمكدن ياخاسيني كنارا چكيب، اؤز حياتيندان و معنويات عالميندن دم وورور.

     . . . نه قده‌ر كي مرحوم سيد ابوالقاسم متقي، حق پرست بير ذات ايميش و نه قده‌ر اوقاتيني عبادت و رياضتده كئچيرمگي سئورميش، بير او قده‌رده بي‌معرفت و بي‌محبت عبادتي، رياني و ظاهيري زؤهد و تقواني توتماز ايميش.

     از بس كي عوامليق و عوامليغيميزدان مليّت‌حسي بيزلرده آييلماييبدير، وطنيميزين، ديليميزين و ادبياتيميزين قدريني بيلميريك. فارسلارين سعدي‌سي و حافيظي ديري قالان كيمي، بيزلرين‌ده ذاكري، سيّدي، نباتي‌سي گركدير ديري قاليسن.»[6]

7- 1. بهلول بهجت

« . . . سيد ابوالقاسم موغان چؤلونده ائلات ايچينده دونيايا گلدي. قيش آيلاريني موغاندا و يازي قاراداغ و قاراباغا كؤچ ائدرميش. توركمانچاي معاهده‌سيندن سونرا بير ديبليك اوشتوبون كندينده يئرلشير و اورا دارالامان آدي دئرير:

     بيرقوناق نيسبت نباتي‌سنده بئش گون اگله‌شيب،/ حؤرمتين ساخلاكي او بير خان‌چوباندير، اوشتوبون!

     حاكيم اولموش اوندا تا ميرزا سليمِ كامكار،/اول سبب‌دن خلقه بير دارالامان‌دير اوشتوبون.



1- الذّريعة، ج 9، ق 4، ص 1168. (رديف 7535)

2- بهجة الشّعرا، كتابخانه‌ي ملي تبريز ده ساخلانيلان اليازماسي، استنساخ: 1299 هـ . خط «حسن حسيني». شماره 406 ، ص 252.

3- مدرّس تبريزي، ريحانة الادب بالكنية او اللقب، ج 6، ص 129 .

4- محمد علي تربيت، دانشمندان آذربايجان، تهران، 1314، ص 370.

5- ديوان نباتي، نشر ادبيه، تهران، مقدمه.

6- فريدون كؤچرلي، آذربايجان ادبياتي، ج 1، ص 470 .

صفحه قبل صفحه بعد
نظر شما
نام : *
پست الکترونیک :
وب سایت/بلاگ :
*
:) :( ;) :D
;)) :X :? :P
:* =(( :O @};-
:B /:) =D> :S
کد امنیتی : *

برچسب ها : سید ابو القاسم نباتی از دیدگاه دکتر حسین محمدزاده صدیق, شناختنامه سید ابوالقاسم نباتی بر اساس پژوهشهای دکتر حسین محمدزاده صدیق,سید ابوالقاسم نباتی به روایت دکتر محمدزاده صدیق, پژوهشهای دکتر حسین محمدزاده صدیق پیرامون سید ابوالقاسم نباتی,تحقیقات دکتر حسین محمدزاده صدیق درباره ابو القاسم نباتی, سید ابوالقاسم نباتی به روایت دکتر حسین محمدزاده صدیق, پژوهشهای دکتر حسین محمدزاده صدیق درباره ابوالقاسم نباتی,
ارسال در تاريخ پنجشنبه 6 مهر 1391 توسط دکتر صدیق. ارسال: سید احسان شکرخدایی