تبلیغات اینترنتیclose
سید ابوالقاسم نباتی ایله ایلگیلی سندلر و قئیدلر- 2 (دکتر حسین محمدزاده صدیق)
سید ابو القاسم نباتی در پژوهشهای دکترحسین محمدزاده صدیق
شرح احوال، افکار و آثار سید ابو القاسم نباتی بر اساس تحقیقات استاد دکتر حسین محمدزاده صدیق
موضوع : سندلر و قئیدلر, | بازدید : 610

8- 1. فيض الله قاسيم زاده

     . . . «فضولي» ذيروه‌سينه يوكسلن تنها شاعير، سيد ابوالقاسم نباتي اولموشدور.

     . . . نباتي‌نين قوشما و تجنيسلري‌نين چوخ آزي بيزه گليب چاتميشدير. اونون قوشمالاريندا انسان محبتي ترنّم ائديلير. اونون ليريك قهرماني حقيقي عاشيقدير.

     . . . قوشما، تجنيس و گرايليلاريندا، نباتي، شيفاهي خلق شعري‌نين، خصوصيله عاشيق شعري‌نين بديعي اصوللاريندان گئنيش استفاده ائدير . . . بديعي شعر ديليني فارس تأثيريندن قورتارير و خلق دانيشيق ديلي خصوصيتلريني ايشله‌دير و شعريميزين ساده‌ليگه دوغرو انكشافيندا مثبت تأثير ائدير.

     . . . نباتي كائناتين سرّلري و حياتين معناسي حاققيندا مركب دوشونجه‌لره دالميشدير. اونون قارشيسينا چوخلو معما و سؤال چيخميشدير. بو معمالارين حللينده شاعير جور به جور شُبه‌لره دوشموشدور.»[1]

9- 1. سخنوران آذربايجان

     «. . . سيد محترم اوشتوبونلو لقبي ايله مشهور اولان آقا مير يحيي اوغلو سيد ابوالقاسيم نباتي، هيجري 1191 ايلينده دونيايا گلميشدير. گنجليك ايللرين صفالي اوشتوبون قريه‌سينده حيواندارليق و باغبانليقلا كئچيرميشدير، طبيعت گؤزلليگي اونو شعر دئمگه چكميش، ياواش ياواش عرفانه أوز گتيرميش، خيام، مولوي و حافظ ديوانلارين اوخوموشدور . . . سونرالار اهره گلميش شيخ شهاب الدين بقعه‌سينده رياضت و عزلته باشلاميشدير. نباتي صوفي مسلك شاعير اولموش، آذربايجان توركوسو و فارسي ديللرينده شعر يازميشدير.»[2]

10- 1. مير علي منافي

     « . . . اوستاد شاعير نباتي، خان چوباني، مجنونشاه و باشقا تخلص‌لر له اثرلر يازميشدير. نباتي ياراديجيليغيندا اساساً ايكي مكتبين تأثيري دويولور. بونلاردان بيري كلاسيك ادبيات، ايكينجي‌سي شيفاهي خلق ياراديجيليغيدير. عرب، فارس و توركو ديللريني اينجه‌ليكلرينه قده‌ر بيلن نباتي، كلاسيكلري اوخويوب دويموش، سئوميش، لاكين هئچ كسي تقليد و تكرار ائتمه‌ميشدير.»[3]

 

11- 1. ابوالفضل حسيني (حسرت)

     «نباتي مكتبينده ايكي ادبي مكتب، ايكي گوجلو تأثير، ايكي شاهراه واردير. بونلاردان بيري كلاسيك ادبيات، ديگري شفاهي خلق ياراديجيليغيدير.

     . . . او حقيقت، تميز انسان، شخصيت آزادليغي و وجدان استقلالي طرفداريدير.

     . . . نباتي‌نين اثرلرينده ظلم و ستمكارلار عليهينه چوخلو كسگين فيكيرلر واردير. او شاهين و اؤلكه‌ني اداره ائدن باشقا شخصلرين ظولموندن و لياقت‌سيزليگيندن متأثر اولور.

     . . . نباتي‌نين شيفاهي خلق شعري روحوندا يازديغي اثرلر، اوزون مدت عاشيقلارين ديلي‌نين ازبري اولموشدور. حتي ائرمني عاشيقلاري‌نين‌دا چوخو، اؤز نغمه‌لريني شاه ختايي ايله ياناشي نباتي آدي ايله، شاعيرين: گئت دولانگيلن، خامسن هنوز شعري‌نين آهنگينده قوشموشدولار.»[4]

 

12- 1. واقف، شاعر زيبايي و حقيقت

     . . . جنوبي آذربايجان شاعيري نباتي‌ده واقيفين داها چوخ تأثيري اولموشدور. بو رئاليست شاعير، قانلي ايران- روس ساواشلاري ايللرينده ياشاييردي. ايران شاهي و روس تزاري آراسيندا گئدن ساواش، آذربايجاندا قيرغينلار و آغير مالياتلارا شاهيد ايدي.

     نباتي، خان چوبان لقبي ايله ده مشهور اولموشدور. تذكره‌چيلر، اونو درين فلسفي شعرلرينه گؤره، درويش مسلك و صوفي مشرب آدلانديرميشلار.

     نباتي حياتيندا تدقيقات آپارانلار، اونو گاه صوفي، گاه شيعي، بعضاً ده وحدت وجودا قائيل اولان شخص سايميشلار و بير واخت‌دا دئميشلر: "بو حئيرتلي حالدا، اوزامان شرقده رايج هئچ بير فيرقه‌يه باغلانماميش و ايتگينليك حاللارين هر زامان بيان ائتميشدير.

     حالبو كي نباتي، اؤز باباسي نسيمي كيمي، بوتون عؤمور بويو حروفيليك ايده‌يالاريندان و فضل الله نعيمي تبريزي و حروفيه بؤيوكلري‌نين عقيده‌لريندن مدافيعه ائتميش و حروفيليك دونيا گؤروشونو تبليغ ائيله‌ميشدير. حله‌ده اهل حق‌طايفالاري، اوندان قالان مقدس كلام‌لاري اؤز عرفاني محفيللرينده مخصوص بير شور و جذبه ايله ترنم ائدرلر.

     نباتي بو شعرلرده، انساني كائناتين سروري و اؤزونو سرّهويدا آدلانديرير و بئله ظن ائدير كي معجزه‌لر اوندا عيان اولموشدور . . .

     اونون بير چوخ شعرلرينده آذربايجان طبيعتي و گؤزلليكلري ترنم اولونور و گؤزللر توصيف ائديلير. اونون چاغداشلاريندان، كيمسه اونون كيمي آذربايجان طبيعتينه وورغون اولماميشدير. بوتون قوشما، گرايلي و تجنيسلري‌نين مضمونونو بو جهت تشكيل ائدير و ائله بونا گؤره ادعا ائده‌بيلريك واقيفين اوندا مستقيم تأثيري اولموشدور. نباتي‌ده، واقيف كيمي آذربايجان ديلي‌نين حدودسوز امكانلاريندان فايدالانير و خلق ديلي‌نين بديع تشبيه و كينايه‌لرين ايشلتمگه چاليشير و شيفاهي ديلدن بير چوخ اصطلاحي، ادبي ديليميزه وارد ائدير. ائله بونا گؤره‌ده، نباتي‌نين بير چوخ شعرلري كوتله‌وي ترانه‌لر حالينا دؤنموشدور . . .

     نباتي واقيفدن تأثير آلماق (و نه تقليد ائتمك) ايله، واقيف مكتبي شعر حركاتيني گوجلنديرميش، طبيعت وصفي و عشاير حياتي‌نين مضونلارين‌دا اونا آرتيرميشدي و آذربايجان ادبياتيني گئرچكچيليك يولوندا، داها تكامله ساري چكميشدير و اؤزوندن سونراكي شاعيرلرين توجّهون اؤز خلاقيّتينه جلب ائتميشدير.

     نباتي، اؤز شعرلرينده، حتي بير چوخ يئرده اؤزون واقيف ايله مقايسه ائدير. مثلاً بير يئرده اونون مقابلينده كي قاراباغ بولبولو تعبيريله آدلانميشدي، اؤزونو قاراداغ بولبولو آدلانديرير:

     من نباتي داغم، بلبل قاراداغم،/ داغ من سيه دل كرد لاله‌هاي حمرا را.

 

     گئرچك حياتدان ايلهام آلان نباتي، اؤز زمانه‌سينده سياسي- اجتماعي وضعيّتين منطقي بير محصولو ايدي، اونون حاققيندا گثنيش تحليله احتياج واردير. بورادا ايسه، يالنيز خلاقيّتينده واقيفين تأثيرين گؤسترمك ايچون بير اشاره‌لر ائتديك. آشاغيداكي بندلر واقيف شعري‌نين روحون يادا سالير:

 

     يئنه گؤزوم دوشدو بيرمه جمالا،/ آغ أوزونده قارا مشكين خالي وار.

     حلقه- حلقه اولوب زولف مشكيني،/ لوحش الله! عجب قد دالي وار.[5]

     * * *

     صفحه‌ي روخساري بدر منوّر،/ دؤشه‌نيب أوستونه زولف معنبر.

     ديشلري مورواري، دهاني شكّر،/ لبلري‌نين عجب دادلي بالي وار.[6]

     * * *

     اؤزو شيرين، سؤزو شهد شكر ريز،/ عيشوه‌سي دلروبا، غمزه‌سي خونريز،

     ياناغي برگ گول، زولفو دلاويز،/ دهاني مورواري خزانه‌سيدير.[7]

 

     سيد ابوالقاسم نباتي اوشتوبونلو تغزّل ميراثي‌نين قيمتلي خزينه‌سي، دولغون واقيف مكتبيندن سيراب اولموشدور و آذربايجان شعرين اؤز زامانيندا حقيقت پرستليگين و گئرچكچيليگين ان اوجا ذيروه‌لرينه چاتديرميشدير.

     نباتي‌ ظهور ائدندن سونرا، ادبيات تاريخيميزده واقيف- نباتي مكتبي حاكيم اولور و شعرين اصيل جريانين تشكيل ائدير. حتي غزل يازان شاعيرلرده بو مكتبين تأثيريندن قيراقدا قالا بيلميرلر. مثلاً: حئيران خانيم، سيد عظيم شيرواني، خورشيد بانو ناتوان، محمد باقير خلخالي، شكوهي مراغه‌اي، رضا صراف، حكيم لعلي، حكيم هيدجي و سائره‌ني آد آپارماق اولار. اونلارين حتي شعر ديللري، واقيف و نباتي‌دن قاباقكي شعر ديليله فرقليدير. مثال ايچون، محمد باقر خلخالي‌نين تولكوناغيلي (= ثعلبيه) كيتابيني نظرده آلساق، اونون فولكلوريك مضمونو و كوتله‌وي بيانيني واقيف- نباتي مكتبي تأثيري ايله باغلامايا بيلمه‌ريك. چونكه بو مثنوي واقيفدن قاباقكي مثنويلر ايله ( مثلاً: مسيحي‌نين ورقا و گلشاه مثنويسي ايله) هر جهتدن فرقليدير. و اؤز تكامل تاپميش فورماسي ايله، واقيف- نباتي مكتبي‌نين آذربايجان شعريني، هم محتوي و هم فورما باخيميندان گئرچكچيليگين‌ان اوجاذيروه‌لرينه چاتديرماسينا بير ثبوتدور. بئله كي آذربايجان شاعيرلري اوزون مدت ادبيات تاريخيميزين بو ايكي شخصيتي‌ني سيتايش ائتديلر. نئجه كي فيلسوف شاعيريميز سيد عظيم شيرواني، واقيفين مبارزه‌لر و فاداكارليقلارين تصور ائتمكله، اونون ياشاديغي مقاوم شوشا (= شيشه) قلعه‌سي‌نين كافرلر اؤنونده مقاومتيندن بير عموم مدني سيمبول كيمي دئيير:

     شيشه را باريده است از چرخ سنگ فتنه‌ها،/ بر حصار شيشه لوطف حق نگهبان مي‌رود!»[8]

 

13- 1. قشقايي شعري

     «. . . نباتي تخلّصلو سيد ابوالقاسيم، آذربايجانين بؤيوك شاعيرلريندندير. اونون أورگه ياتان شعرلري واردير. بو شاعيرين توركو ديلينده‌كي ديواني، اوزون زامانلاردان بري قاشقايي ائلي آراسيندا وار اولموشدور. ائلين گؤزل خط يازانلاري، اونون شعر ديوانيني گؤزل خط ايله يازارميشلار كي اينديده بير چوخ عائله‌لرده اونون أليازمالاين تاپماق اولار.

     . . . نباتي ديواني اوتوموبيل و طيّاره و دميريول اختراعيندان سونرا قاشقايي ائلينه يول تاپماميشدير. أن آزي يوزايل بوندان قاباق ياشايان ائل شاعيريميز مأذون اوندان ايلهام آلميشدير. سؤز يوخ كي بو تأثير مأذوندان قاباق‌دا وار اولموشدور.

     يوزايل قاباق بو اثرلرين تاجيرلر و آل وئرچيلر وسيله‌سيله قاشقاييلار آراسينا گلمه‌لرينه‌ده عائد، سنديميز يوخدور. جرأتله دئمك اولار كي [نباتي] قاشقايي ائليله بيرليكده ياشاميشدير . . . چونكه قاشقاييلار اؤزلرين آذري توركي حساب ائدير و تبريزي، مشهد كيمي، ارض مقدس بيليرلر. نئجه كي بير باياتيدا دئميشلر:

     بويول گئدير تبريزه،/ قنات ريزه- ريزه!

     الله بيزه بير يول وئر،/ بيز واراق اؤلكه ميزه.

 

     . . . نباتي ديواني قاشقايي ائلي‌ايله يولداش و همسفر اولموشدور.»[9]

 

14- 1. تذكره‌ي شعراي آذربايجان

   «اوشتوبونلو سيد محترم لقبي ايله تانينان مير يحيي اوغلو سيد ابوالقاسم شعرده نباتي تخلص ائدردي و مجنونشاه آدي ايله تانينيردي . . . اونون عين العشق آدلي منظومه‌سي واركي لاهور دا نشر اولوبدور. نباتي طبيعت گؤزلليك‌لرينه وورغون ايدي و شعرلرينده طبيعت منظره‌لريندن ايلهام آلاردي . . .»[10]



7- فيض الله قاسم زاده، آذربايجان ادبياتي تاريخي، ج 2، ص هـ .

8- سخنوران آذربايجان، ص 123.

9- جنوبي آذربايجان 19- نجو عصر ادبيات آتتاشورياسي، ص 77 .

10- ابوالفضل حسيني، نباتي، آذربايجان س‌س‌ر علملر آكادمي‌سي نشري، باكو، 1963.

11 ← 1/ 2- 2

12  ← 4/ 2- 2

13 ← 3/ 4- 2

14- ح. م. صديق، واقف شاعر زيباي و حقيقت، تهران،‌ 1351، ص 70 .

15- شهباز شهبازي، قشقايي شعري، شيراز، 1380، مقدمه.

16- محمد ديهيم، تذكره‌ي شعراي آذربايجان، ج 1، ص 240 .

صفحه قبل صفحه بعد
نظر شما
نام : *
پست الکترونیک :
وب سایت/بلاگ :
*
:) :( ;) :D
;)) :X :? :P
:* =(( :O @};-
:B /:) =D> :S
کد امنیتی : *

برچسب ها : سید ابو القاسم نباتی از دیدگاه دکتر حسین محمدزاده صدیق, شناختنامه سید ابوالقاسم نباتی بر اساس پژوهشهای دکتر حسین محمدزاده صدیق,سید ابوالقاسم نباتی به روایت دکتر محمدزاده صدیق, پژوهشهای دکتر حسین محمدزاده صدیق پیرامون سید ابوالقاسم نباتی,تحقیقات دکتر حسین محمدزاده صدیق درباره ابو القاسم نباتی, سید ابوالقاسم نباتی به روایت دکتر حسین محمدزاده صدیق, پژوهشهای دکتر حسین محمدزاده صدیق درباره ابوالقاسم نباتی,
ارسال در تاريخ پنجشنبه 6 مهر 1391 توسط دکتر صدیق. ارسال: سید احسان شکرخدایی